މިއަދުގެ މުޖުތަމަޢުގައި މާލީ ތަނަވަސްކަން ނެތަސް، ދަރަނިވެރިވެގެން ނަމަވެސް އަގުބޮޑެތި ތަކެތި ގަނެ، ފެންވަރު މަތިކޮށްގެން އުޅުމަކީ ގިނަ ބައެއްގެ އާދައަކަށް ވެފައިވެއެވެ. މިފަދަ އާދަތަކުގެ ސަބަބުން ވަގުތީ އުފަލެއް ލިބުނު ކަމުގައިވިޔަސް، ދުރު ރާސްތާގައި ކުރިމަތިވާ ދަތިތަކާއި ގެއްލުންތައް ވަރަށް ބޮޑެވެ.
އެއްގޮތަކަށް ބަލާނަން މިއީ ކިބުރުވެރި ކަމާއި ބޮޑާކަމޭވެސް ބުނެވިދާނެއެވެ
މިއަދުގެ ފަތިސްތަރީގައި ކުރުގޮތަކަށް ދިވެހިންގެ ތެރޭ ފެތުރިފައިވާ މި އާދައަކަށް އަލިއަޅުވާލާނަމެވެ.
އިޖުތިމާޢީ ބަދަލުތަކާއި ދިރިއުޅުމުގެ ފެންވަރު؛ މިހާރުގެ ޒުވާނުންގެ މެދުގައި އަގުބޮޑެތި ފޯނުތަކާއި، ބްރޭންޑެޑް އަތްދަބަސްފަދަ ތަކެތި ގެންގުޅުމަކީ އިޖްތިމާޢީ ހައިސިއްޔަތުގެ މިންގަނޑަކަށް ވެފައިވެއެވެ. މިކަމުގެ ސަބަބުން، އަމިއްލަ މާލީ ޤާބިލުކަމަށް ނުބަލައި، ދަރަނިވެރިވެގެން ނަމަވެސް މިފަދަ ތަކެތި ގަތުމަށް މަޖުބޫރުވެފައިވާ ޙާލަތު ވަނީ އައިސްފައެވެ.
ދަރަނީގެ ވަޅުގަނޑަށް ވެއްޓުން؛ ދަރަނިވެރިވެގެން އަގުބޮޑެތި ތަކެތި ގަތުމުގެ ސަބަބުން، ގިނަ ބަޔަކު ވަނީ ދަރަނީގެ ވަޅުގަނޑަށް ވެއްޓިފައެވެ. އެއް ދަރަނި އަދާކުރުމަށް އަނެއް ދަރަނި ނަގަން ޖެހުމާއި، މަހުން މަހަށް ލިބޭ އާމްދަނީގެ ބޮޑު ބައެއް ދަރަނި އަދާކުރުމަށް ހޭދަކުރަން ޖެހުމަކީ މިކަމުގެ ސަބަބުން ކުރިމަތިވާ ބޮޑެތި ގޮންޖެހުންތަކެވެ.
ނަފްސާނީ އަސަރުތައް؛ މާލީ ދަތިތަކުގެ ސަބަބުން ކުރިމަތިވާ ނަފްސާނީ އަސަރުތައް ވަރަށް ބޮޑެވެ. ދަރަނި އަދާނުކުރެވި ކުރިމަތިވާ ޕްރެޝަރާއި، އާއިލީ ގުޅުންތަކަށް އަންނަ ހީނަރުކަމާއި، ނިދި ނުލިބުމާއި ކަންބޮޑުވުންފަދަ އެތައް މައްސަލަތަކެއް ދިމާވެއެވެ.
މުސްތަޤުބަލަށް ކުރާ ނޭދެވޭ އަސަރު؛ ދަރަނިވެރިވެގެން އަގުބޮޑެތި ތަކެތި ގަތުމުގެ ސަބަބުން މުސްތަޤުބަލަށް ރޭވުމަށް ހުރަސްތަކެއް ކުރިމަތިވެއެވެ. ގެދޮރު ގަތުމަށް ފައިސާ ރައްކާނުކުރެވުމާއި، ދަރިންގެ ތަޢުލީމަށް އިންވެސްޓް ނުކުރެވުމާއި، ރިޓަޔަރމަންޓަށް ފައިސާ ރައްކާނުކުރެވުން ފަދަ ގިނަ މައްސަލަތަކެއް ދިމާވެއެވެ.
ރަނގަޅު ހައްލުތައް؛ މިފަދަ މައްސަލަތަކުން ސަލާމަތްވުމަށް އެންމެ މުހިންމު ކަމަކީ ލިބޭ އާމްދަނީއަށް ބަލައި ޚަރަދުކުރުމެވެ. އަދި ކޮންމެހެން ބޭނުން ނޫން ތަކެތި ގަތުމުގައި ޚަރަދު ކުޑަކޮށް، ސޭވިންގްސްއަށް އިސްކަންދިނުމެވެ. މީގެއިތުރުން، އިޖްތިމާޢީ ޕްރެޝަރަށް ލެނބިގެން ނުދިއުމާއި، އަމިއްލަ މާލީ ލަނޑުދަނޑިތަކަށް އިސްކަންދިނުން މުހިންމެވެ.
މާލީ ތަނަވަސްކަން ނެތި ދަރަނިވެރިވެގެން ފެންވަރު މަތިކުރުމަކީ ވަގުތީ އުފަލެއް ލިބުނު ކަމުގައިވިޔަސް، ދުރު ރާސްތާގައި ވަރަށް ބޮޑެތި ގެއްލުންތަކެއް ލިބޭނެ ކަމެކެވެ. އެހެންކަމުން، މާލީ ދުޅަހެޔޮކަން ހޯދުމަށް ރަނގަޅު ޕްލޭނެއް ހަދައި، އެއާ އެއްގޮތަށް ޢަމަލުކުރުމަކީ ކޮންމެހެން މުހިންމު ކަމެކެވެ.
