ގައްޒާގައި ހިނގަމުންދާ ހަނގުރާމަ ވަގުތުން ހުއްޓާލުމަށާއި، ޝަރުތެއް ނެތި އަދި ދާއިމީކޮށް ހަނގުރާމަ ހުއްޓުވުމަށް ގޮވާލާ، އދ. ގެ ސަލާމަތީ މަޖިލީހަށް ހުށަހެޅުނު ޤަރާރެއް އެމެރިކާއިން ވީޓޯކޮށްފިއެވެ. މި ޤަރާރުގައި ބަނދުކުރެވިފައިވާ ސަރަހައްދަށް ހުރަހެއްނެތި އިންސާނީ އެހީ ފޯރުކޮށްދިނުމަށްވެސް ގޮވާލާފައިވެއެވެ.
އދ. ގެ ސަލާމަތީ މަޖިލީހުގެ 15 މެންބަރުންގެ ތެރެއިން 14 މެންބަރުން ވޯޓުދިނީ ޤަރާރާ އެއްކޮޅަށެވެ. ނަމަވެސް، އެމެރިކާއިން މި ޤަރާރު ވީޓޯކުރުމާއެކު، ޤަރާރު ވަނީ ފާސްނުވެ ހުއްޓިފައެވެ. “އެމެރިކާ އިން ދެމިހުންނާނީ އދ. ގައި އިސްރާއީލްގެ ފަރާތުގައި” ކަމަށް އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ ވިދާޅުވިއެވެ.
ވޮޝިންގްޓަނުން މި ވީޓޯ ޖަސްޓިފައިކޮށްފައިވަނީ މި ޤަރާރުން މިހާރު ކުރިއަށްދާ ޑިޕްލޮމެޓިކް މަސައްކަތްތަކަށް ހުރަސްއެޅޭނެ ކަމަށާއި އިސްރާއީލްގެ އަމިއްލަ ދިފާއުގެ ހައްޤު ބަލައިނުގަންނަ ކަމަށް ބުނެއެވެ. މި ވީޓޯއަށް ބައިނަލްއަޤްވާމީ ފާޑުކިޔުންތައް ވަނީ ކުރިމަތިވެފައެވެ.
ހަމާސްއިން މި ފިޔަވަޅު ކުށްވެރިކޮށް، އެމެރިކާއިން ނަސްލު ހަލާކުކުރުމަށް ތާއީދުކުރާ ކަމަށާއި ގައްޒާގައި ގިނަ އަދަދަކަށް މީހުން މެރުން ޤާނޫނީކުރާ ކަމަށް ތުހުމަތުކޮށްފައިވެއެވެ. ޕާކިސްތާނުގެ އދ. އަށް ހުންނަ ސަފީރު މި ވީޓޯ ސިފަކުރެއްވީ ސަލާމަތީ މަޖިލީހުގެ “އަޚްލާޤީ ލަކުނެއް” ގެ ގޮތުގައެވެ.
ފަލަސްތީނުގެ ސަފީރު ރިޔާދު މަންސޫރު އިއުލާނުކުރެއްވީ މި މައްސަލަ އދ. ގެ އާންމު މަޖިލީހަށް ގެންދިއުމުގެ ރޭވުން އޮތް ކަމަށެވެ. އެތަނުގައި އެއްވެސް މެންބަރަކަށް ވީޓޯގެ ބާރު ނުލިބެއެވެ. މިއީ 2025 ގެ ޖަނަވަރީ މަހުން ފެށިގެން ސަލާމަތީ މަޖިލީހުގައި އެމެރިކާއިން ކުރި ފުރަތަމަ ވީޓޯއެވެ. އިސްރާއީލް ވަނީ ގައްޒާގެ އިންސާނީ ޙާލަތު ގޯސްވަމުންދާތީ އިތުރުވަމުންދާ ބައިނަލްއަޤްވާމީ ޕްރެޝަރުގެ ދަށުގައެވެ.
