ދިވެހި ރާއްޖޭގެ ގައުމީ އެއާލައިން މޯލްޑިވިއަންއިން މި މަހުގެ ފަހުކޮޅު އުމުރާ ދަތުރުތައް ފެށުމަށް ހަމަޖެހިފައިވާ ކަމަށް އެ ކުންފުނިން މިއަދު ހާމަކޮށްފިއެވެ.
މޯލްޑިވިއަންއިން މަޢުލޫމާތު ދެއްވި ގޮތުގައި، މި މަހުގެ 22 އަދި 27 ވަނަ ދުވަހު ޖުމުލަ ތިން ދަތުރު ކުރުމަށް ވަނީ ހަމަޖެހިފައެވެ. މި ދަތުރުތަކުގެ ތެރޭގައި ހައްޖު ކޯޕަރޭޝަންގެ ފަރާތުން ދެ ދަތުރާއި އަލް މުސާފިރު ގުރޫޕުން އެއް ދަތުރު ހިމެނެއެވެ.
“ހުރިހާ ފަރާތްތަކަށް ވެސް އެބައޮތް ހަމަ އުމުރާއަށް މީހުން ގެންގޮސްދިނުމަށް ރިކުއެސްޓްކުރުމުގެ ފުރުސަތު. މިހާރު ވެސް ވަރަށް ގިނަ ފަރާތްތަކުން އެދެމުންދަނީ،” މޯލްޑިވިއަންގެ ފަރާތުން ވިދާޅުވިއެވެ.
އެއާލައިންގެ އާންމު އޮޕަރޭޝަންތަކަށް ދަތިނުވާނެ ގޮތަށް އުމުރާ ދަތުރުތައް ކުރިއަށް ގެންދާނެ ކަމަށް މޯލްޑިވިއަންއިން ހާމަކުރެއްވިއެވެ. އަދި މި މަހުގެ ފަހުކޮޅު ކުރާ ތިން ދަތުރަށްފަހު އިތުރު ދަތުރުތައް ވެސް ކުރިއަށް ގެންދާނެ ކަމަށް އެ ކުންފުނިން ބުންޏެވެ.
މި އުމުރާ ދަތުރުތައް ކުރިއަށް ގެންދަނީ މިއަހަރު އެ ކުންފުންޏަށް ގެނައި ވައިޑް ބޮޑީ މަތިންދާބޯޓުގައެވެ. އަދި މިއަހަރުގެ ތެރޭގައި އިތުރު ވައިޑް ބޮޑީ މަތިންދާބޯޓެއް ގެނައުމަށް އެ ކުންފުނިން މަސައްކަތްކުރަމުންދާ ކަމަށްވެސް މަޢުލޫމާތު ލިބިފައިވެއެވެ.
