ވެލާނާ އިންޓަނޭޝަނަލް އެއާޕޯޓުގެ އަލަށް ހުޅުވި ޓާމިނަލުން ފުރަތަމަ ހިދުމަތް ދޭނީ މޯލްޑިވިއަން އިން މިދިޔަ ޖެނުއަރީ މަހު ރާއްޖެ ގެނައި ވައިޑް ބޮޑީ އެއާކްރާފްޓް އޭ330ގެ ފްލައިޓުން އަންނަ ފަސިންޖަރުންނަށް ކަމަށް އެ އެއާލައިނުން މިއަދު ހާމަކޮށްފި އެވެ.
މޯލްޑިވިއަންގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވި ގޮތުގައި، މިއަދު މެންދުރު ފަހު ކޮޗިން އިން ރާއްޖެ އަންނަ ފުރަތަމަ ފްލައިޓުގެ ފަސިންޖަރުންނަށް ހިދުމަތްދޭނީ އާ ޓާމިނަލުން ނެވެ.
މި ތާރީހީ ދަތުރުގައި ހިދުމަތް ދޭ ކްރޫ އިން ވެސް ތިބޭނީ ދިވެހި ހެދުމުގަ އެވެ.
ކޮޗިން އިން ރާއްޖެ އަންނަ ފްލައިޓު މެންދުރު ފަހު ގާތްގަނޑަކަށް 2:00 ގައި ވެލާނާ އިންޓަނޭޝަނަލް އެއާޕޯޓަށް ޖައްސާނެ ކަމަށާއި، އޭގެ ފަހުން މޯލްޑިވިއަންގެ ހުރިހާ ބޯޓަކަށް އާ ޓާމިނަލް މެދުވެރިކޮށް ހިދުމަތް ދޭން ފަށާނެ އެވެ.
މިއަދުން ފެށިގެން އާ ޓާމިނަލް މެދުވެރިކޮށް މޯލްޑިވިއަންގެ ފްލައިޓުތަކަށް ހިދުމަތް ދޭ އިރު، މަޑުމަޑުން އެހެން އެއާލައިންތަކުގެ ފްލައިޓުތަކަށް ވެސް ހިދުމަތް ދޭން ފަށާނެ ކަމަށް އެމްއޭސީއެލްއިން ބުނެފައިވެ އެވެ. އެ ކުންފުނީގެ އަމާޒަކީ އަންނަ ސެޕްޓެމްބަރު މަހަށްވާ އިރު އެ އެއާޕޯޓު ބޭނުންކުރާ 34 އެއާލައިންގެ މަތިންދާ ބޯޓުތަކަށް އާ ޓާމިނަލުން ހިދުމަތް ދޭން ފެށުމެވެ.
އާ ޓާމިނަލަށް 457 މިލިއަން ޑޮލަރު (ހަތް ބިލިއަން ރުފިޔާ) ހޭދަކޮށްފައިވާ އިރު، އެންމެ ޒަމާނީ އޭވިއޭޝަން ހިދުމަތްތަކާ އެކު ހުޅުވާފައިވާ މި ޓާމިނަލުން އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭނެ އެވެ. އާ ޓާމިނަލް ރަސްމީކޮށް ރޭ ހުޅުވީ، ހަވާ އާއި ޑްރޯންގެ ކުލަ ގަދަ ހަރަކާތްތަކާ އެކު ރައީސް ޑރ. މުހައްމަދު މުއިއްޒުގެ ހާޒިރުގައެވެ.
