ވެލާނާ އިންޓަނޭޝަނަލް އެއަރޕޯޓުގެ އައު ޓާމިނަލަށް ފުރަތަމަ އައި ފަސިންޖަރުންނަށް ސަރުކާރުގެ އިސް ވަޒީރުންނާއި އެމްއޭސީއެލްގެ އިސް ވެރިން މަރުޙަބާ ކިޔައިފިއެވެ.
މި ތާރީޚީ މުނާސަބަތުގައި ފަސިންޖަރުންނަށް މަރުޙަބާ ކިޔުމަށް ޓަކައި މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު، ދަތުރުފަތުރާއި މަދަނީ ވައިގެ ދަތުރުފަތުރާ ބެހޭ ވަޒީރު މުޙައްމަދު އަމީން، އަދި ފަތުރުވެރިކަމާއި ތިމާވެށްޓާ ބެހޭ ވަޒީރު ޠާރިޤު އިބްރާހީމް ބައިވެރިވެ ވަޑައިގެންނެވިއެވެ.
މީގެއިތުރުން އެމްއޭސީއެލްގެ ފަރާތުން ޗެއަރޕާސަން އާއިޝަތު ނުރައިން ޖަނާޙް އާއި ސީއީއޯ އަދި އެމްޑީ އިބްރާހިމް ޝަރީފް މުޙައްމަދުގެ އިތުރުން ކުންފުނީގެ އިސް މެނޭޖްމަންޓް ޓީމް މި ރަސްމިއްޔާތުގައި ބައިވެރިވެ ވަޑައިގެންނެވިއެވެ.
އައު ޓާމިނަލަށް އެންމެ ފުރަތަމަ އައި ފްލައިޓަކީ މޯލްޑިވިއަންގެ ވައިޑް-ބޮޑީ މަތިންދާބޯޓެކެވެ. މި ފްލައިޓުގައި ގާތްގަނޑަކަށް 100
ފަސިންޖަރުން ދަތުރުކުރެއްވިއެވެ. ފަސިންޖަރުން ޓާމިނަލަށް ވަދެވަޑައިގަތީ އޭރޯ ބްރިޖް މެދުވެރިކޮށެވެ.
މި ތާރީޚީ ފްލައިޓު ވެލާނާ އެއާޕޯޓަށް ޖެއްސުމާއެކު ވޯޓާ ސެލިއުޓެއް ދީފައިވެއެވެ. ފްލައިޓުގެ ކްރޫއިން ތިބީ ދިވެހި ހެދުމުގައެވެ. އަންހެން ކްރޫއިން ދިވެހި ދިގު ހެދުމުގައި ތިބިއިރު، ފިރިހެން ކްރޫއިން ތިބީ މުންޑާއި ހުދު ގަމީހުގައެވެ.
މޯލްޑިވިއަންގެ ފްލައިޓް ތަޖުރިބާއަށްފަހު، ޓަރމިނަލް ހުޅުވާލާނީ އެހެން އެއަރލައިންތަކުގެ ނެރޯ ބޮޑީ ފްލައިޓްތަކަށެވެ. މިގޮތުން ގާތްގަނޑަކަށް ތިން މަސް ދުވަހުގެ ތަޖުރިބާ މުއްދަތަކަށްފަހު، ސެޕްޓެމްބަރު މަހުގެ ނިޔަލަށް ރާއްޖެ އަންނަ ބޮޑެތި އެއަރލައިންތަކަށް ޚިދުމަތް ދޭން ފަށާނެކަމަށް ވަނީ ހާމަކޮށްފައެވެ.
އައު ޓަރމިނަލް ރަސްމީކޮށް ހުޅުއްވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. ހުޅުވުމުގެ ރަސްމިއްޔާތުގައި ކުލަގަދަ ހަރަކާތްތަކެއް ކުރިއަށް ގެންގޮސްފައިވެއެވެ. މީގެ ތެރޭގައި ވެލާނާ އެއަރޕޯޓުގެ ތާރީޚީ ރިޕޯޓެއް ހުށަހެޅުމާއި، ޚާއްސަ ތިއޭޓްރިކަލް ހުށަހެޅުމަކާއި، ޑްރޯން ޝޯއެއް ހިމެނެއެވެ.
