ޤައުމީ އެއަރލައިން މޯލްޑިވިއަން އިން ބ. ކަމަދުއަށް ސީޕްލޭންގެ ދަތުރުތައް އަންނަ ހަފުތާގެ ބުރާސްފަތި ދުވަހު ފެށުމަށް ތައްޔާރު ވެއްޖެއެވެ. މިއީ ކަމަދޫގެ ފަތުރުވެރިކަމުގެ ދާއިރާއަށް ލިބިގެންދާނެ ވަރަށް ބޮޑު ކުރިއެރުމެކެވެ.
މޯލްޑިވިއަނާއި ހޯކްސް ހޮޓެލްސްއާ ދެމެދު މި ޚިދުމަތް ފެށުމަށް ސޮއިކުރެވުނު އެއްބަސްވުމުގައި ސޮއިކުރެވިފައިވަނީ ރައީސުލްޖުމްހޫރިއްޔާ އެ ރަށަށް މިދިޔަމަހު ކުރެއްވި ދަތުރުފުޅުގެ ތެރެއިންނެވެ. މި ޚިދުމަތް ފޯރުކޮށްދޭނީ ކޮންމެ ހަފުތާއެއްގެ ބުރާސްފަތި އަދި ހޮނިހިރު ދުވަހުއެވެ. އަދި ދިވެހިންނަށް ޚާއްސަ ފެއަރއެއްގެ ގޮތުގައި މާލެއިން ކަމަދުއަށް ދަތުރުކުރުމަށް 1199 ރުފިޔާގެ އަގެއް ވަނީ ކަނޑައަޅާފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ ސީޕްލޭންގެ ޚިދުމަތް ފެށިގެންދިއުމަކީ ލޯކަލް ޓޫރިޒަމް މިހާބޮޑަށް ތަރައްޤީވެފައިވާ ރަށަކަށް ވަރަށް ބޮޑު އިޤްތިޞާދީ ފައިދާއެއް ކުރާނެ ކަމެއް ކަމަށެވެ. “އެކަމަށްޓަކައި މިރަށުގެ އެންމެހާ ރައްޔިތުންނަށް ވަރަށް ބޮޑަށް މަރުހަބާ ދަންނަވަން” ރައީސް ވިދާޅުވިއެވެ.
ކަމަދޫއަކީ ގުދުރަތީ ރީތިކަމާއި ފެހިކަންގަދަ ގަސްތަކާއި، ހިތްހެޔޮ ރައްޔިތުންގެ ސަބަބުން ފަތުރުވެރިންގެ މެދުގައި މަޤުބޫލު މަންޒިލެކެވެ. އެ ރަށަކީ ދަރަވަންދޫއަށްފަހު ބ. އަތޮޅުން އެންމެ ގިނަ އެނދު ރާއްޖޭގެ ފަތުރުވެރިކަމުގެ ސިނާޢަތަށް ނެރެދީފައިވާ ރަށެވެ.
ކަމަދޫގައި އިތުރު ގެސްޓްހައުސްތައް ހުޅުވުމުގެ މަސައްކަތް ކުރިއަށްދާއިރު، ސީޕްލޭން ދަތުރުތައް ފެށުމާއެކު ރަށަށް ޒިޔާރަތްކުރާ ފަތުރުވެރިންގެ އަދަދު އިތުރުވެ، ރަށުގެ ފަތުރުވެރިކަން އިތުރަށް ކުރިއަރައިގެންދާނެ ކަމަށް ރަށުގެ ރައްޔިތުން އުންމީދުކުރެއެވެ.
