ރާއްޖޭގެ ޤައުމީ އެއާލައިން މޯލްޑިވިއަންއިން ދެކުނު އިންޑިއާގެ ދެ ސިޓީއަކަށް ކުރާ ދަތުރުތަކުގެ އަގު ބޮޑުތަނުން ހެޔޮ ކޮށްފިއެވެ. މި ހާއްސަ ފެއާގެ ދަށުން ކޮޗިން އަދި ތިރުވަނަންތަޕުރަމްއަށް ކުރާ ދަތުރުތަކުގެ އަގު ވަނީ ވަރަށް ބޮޑުތަނުން ކުޑަކޮށްފައެވެ.
މޯލްޑިވިއަންއިން އިއްޔެ ނެރުނު ބަޔާނެއްގައި ބުނެފައިވާ ގޮތުގައި، ދެކުނު އިންޑިއާއާއި ރާއްޖެއާ ދެމެދު ދަތުރުކުރުމަށް އިސްކަންދޭ އެއާލައިނެއްގެ ގޮތުގައި ހަރަކާތްތެރިވުމަށް މަސައްކަތްކުރަމުންދާއިރު، ފޯރުކޮށްދޭ ޚިދުމަތްތައް ވެސް ރަނގަޅުކުރަމުން ގެންދެއެވެ. މި ފެއާގެ ދަށުން ކޮޗިންއަށް ކުރާ ދަތުރުތަކުގެ އަގު ފެށޭނީ 176 އެމެރިކާ ޑޮލަރުން ކަމަށާއި، ތިރުވަނަންތަޕުރަމްއަށް ކުރާ ދަތުރުތަކުގެ އަގު ފެށޭނީ 232 އެމެރިކާ ޑޮލަރުން ކަމަށް އެ ކުންފުނިން ބުނެފައިވެއެވެ. އަދި ހަނިމާދޫއިން ތިރުވަނަންތަޕުރަމްއަށް ކުރާ ދަތުރުތަކުގެ އަގު ފެށޭނީ 337 އެމެރިކާ ޑޮލަރުންނެވެ.
މި ދަތުރުތަކުގައި ފަސިންޖަރުންނަށް ލިބޭ ޚިދުމަތްތަކުގެ ތެރޭގައި އޭ320 މަތިންދާބޯޓުގެ އިކޮނޮމީ ކްލާހުގައި 20 ކިލޯގެ ހިލޭ ބެގޭޖާއި، ހޮޓް މީލްސް އަދި ބުއިންތައް ހިމެނެއެވެ. އަދި ޕްރިމިއަމް އިކޮނޮމީ ކްލާހުގައި އަވަސް ޗެކް-އިން ޚިދުމަތާއި، 30 ކިލޯގެ ހިލޭ ބެގޭޖް އެލަވަންސް ލިބޭނެއެވެ. މީގެ އިތުރުން ޓިކެޓުގެ ދުވަސް ބަދަލުކުރުމަށް އިތުރު އަގެއް ނުނަގާ ކަމަށާއި، އިތުރު ލެގްރޫމް އަދި ރިކްލައިނަބަލް ގޮނޑިތަކާއި، ޚާއްސަ ކެއުމާއި ބުއިމުގެ ޚިދުމަތްތައް ލިބޭނެ ކަމަށް މޯލްޑިވިއަންއިން ބުނެފައިވެއެވެ.
“މި ފެއާއަކީ ހަމައެކަނި ވިޔަފާރީގެ ގޮތުން ފައިދާވާނެ ކަމެއް ނޫން. މިއީ މުޅި ޤައުމަށް، ޚާއްސަކޮށް ފަތުރުވެރިކަމުގެ ސިނާޢަތަށް ވަރަށް ބޮޑު ކުރިއެރުމެއް ލިބިގެންދާނެ ކަމެއް،” މޯލްޑިވިއަންގެ އިސް ވެރިއެއް ވިދާޅުވިއެވެ.
މި ފެއާގެ ސަބަބުން ދެކުނު އިންޑިއާއިން ދިވެހިރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެ، އެކި ބޭނުންތަކުގައި ދަތުރުކުރާ ފަރާތްތަކަށް އިތުރު ފަސޭހަތަކެއް ލިބިގެންދާނެ ކަމަށް މޯލްޑިވިއަންއިން އުންމީދުކުރެއެވެ.
