ތަޢުލީމީ ދާއިރާއަށް ލުއިފަސޭހަ ގޮތްތަކެއް ހޯދައިދިނުމުގެ ގޮތުން، އެޑިޔުކޭޝަން މިނިސްޓްރީން ދިރާސީ ކަލަންޑަރު ޑިޖިޓަލައިޒްކޮށް، މިނިސްޓްރީގެ އާ ވެބްސައިޓުން ފަސޭހަކަމާއެކު ބަލައިލެވޭނެ ގޮތް ހަމަޖައްސައިފި އެވެ. މީގެ ކުރިން، ރާއްޖޭގެ ހުރިހާ ސްކޫލެއްގެ މައުލޫމާތު ހިމަނައިގެން މިދިޔަ އަހަރު ތައްޔާރުކުރި ވެބްސައިޓުގައި އެކަޑަމިކް ކަލަންޑަރު އާންމުކުރަމުން އައީ ޕީޑީއެފް ފޯމެޓުގަ އެވެ.
މިހާރު ޑިޖިޓަލައިޒްކޮށްފައިވާ ދިރާސީ ކަލަންޑަރުގައި، ސްކޫލް ދުވަސްތަކާއި ބަންދު ދުވަސްތަކާއި އިމްތިހާނު ދުވަސްތަކުގެ އިތުރުން ރަސްމީ ބަންދު ދުވަސްތައް ވެސް ވަކިވަކިން ފާހަގަކޮށް، ފަސޭހައިން ބެލޭނެ ގޮތް ވަނީ ހަމަޖައްސާފަ އެވެ. މީގެ އިތުރުން، ކޮންމެ ޓާމެއްގެ ދުވަސްތައް ވެސް ވަކިން ފެންނާނެ ގޮތަށް ވަނީ އިންތިޒާމުކޮށްފަ އެވެ. މިއީ ތަޢުލީމީ މުވައްޒަފުންނާއި ބެލެނިވެރިންނަށް މައުލޫމާތު ހޯދުމަށް ލިބުނު ބޮޑު ލުޔެކެވެ.
އަންނަ އަހަރަށް މިހާރު އާންމުކޮށްފައިވާ ދިރާސީ ކަލަންޑަރުގައިވާ ގޮތުން، ކިޔެވުން ފެށޭނީ ޖެނުއަރީ 27 ގަ އެވެ.
- ފުރަތަމަ ޓާމުގެ މިޑް ބްރޭކް އޮތީ މެއި މަހުގެ 24 އިން 30 އަށެވެ.
- ފުރަތަމަ ޓާމު ނިމި ޗުއްޓީ ލިބޭނީ ޖުލައި 17 އިން އޮގަސްޓް 1 އަށެވެ.
- ދެވަނަ ޓާމުގެ ކިޔެވުން ފެށޭނީ އޮގަސްޓް 2 ގަ އެވެ.
- ދެވަނަ ޓާމުގެ މިޑް ބްރޭކް ލިބޭނީ ސެޕްޓެމްބަރު 13 އިން 19 އަށެވެ.
- ބޮޑު ޗުއްޓީ ލިބޭނީ ޑިސެމްބަރު 18 އިން އަންނަ ޖެނުއަރީ 12 އަށެވެ.
އަންނަ އަހަރުގެ ކަލަންޑަރުގައި، ސްކޫލުގައި ކިޔަވައިދޭނެ ދުވަސްތަކާއި އެއް ދަންފަޅީގައި ކިޔަވައިދޭނެ ދުވަސްތައް ވަނީ ވަކިކޮށްފަ އެވެ. ހާއްސަ ދުވަސްތަކުގެ ތެރެއިން ކުޑަކުދިންގެ ދުވަހާއި ޓީޗަރުންގެ ދުވަހަކީ އެއް ދަންފަޅީގައި ކިޔަވައިދޭ ދުވަސްތައް ކަމަށް ވެސް ވަނީ ކަނޑައަޅައިފަ އެވެ.
ދިރާސީ އަހަރުގެ ފެށުން ޖެނުއަރީ މަހަށް އަނބުރާ ބަދަލުކުރުމަށް ނިންމާފައި މިވަނީ، ކޮވިޑް-19ގެ ބަލިމަޑުކަމާ ގުޅިގެން 2021 ވަނަ އަހަރު ދިރާސީ އަހަރުގެ ފެށުން އޮގަސްޓު މަހަށް ބަދަލުކުރުމަށް ފަހު، ބެލެނިވެރިންގެ އެދުމުގެ މަތިންނެވެ. މި ބަދަލާއެކު، ރާއްޖޭގައި ޒަމާނުއްސުރެ ދިރާސީ އަހަރު ފެށިފައިވާ ގޮތަށް، އަންނަ އަހަރުން ފެށިގެން ޖެނުއަރީ މަހުގައި ކިޔެވުން ފެށޭނެ އެވެ.
