ނަޞްރުގެ ދުވަހާ ގުޅިގެން، ތިނަދޫ ސިޓީގައި ބޭއްވުމަށް ހަމަޖެހިފައިވާ ހަރަކާތްތަކުގެ ތަފްސީލުތައް އެމްއެންޑީއެފް އިން ވަނީ އާންމުކޮށްފައެވެ. އެގޮތުން މިއަދު (7 ނޮވެންބަރު 2025، ހުކުރު ދުވަސް) ހަވީރު 4:00 ގައި ގދ. އަތޮޅު ތަޢުލީމީ މަރުކަޒުގައި ސިފައިންގެ ފޮޓޯ މަޢުރަޒު ހުޅުވާ، އާންމުންނަށް ބެލުމުގެ ފުރުސަތު ލިބިގެންދާނެއެވެ. އަދި މާދަމާ، 8 ނޮވެންބަރު 2025 (ހޮނިހިރު ދުވަސް) ހެނދުނު 9:00 ގައި ވެސް މި މައުރަޒު ގދ. އަތޮޅު ތަޢުލީމީ މަރުކަޒުގައި ދެމިގެންދާނެއެވެ.

މީގެ އިތުރުން، މާދަމާ (ހޮނިހިރު ދުވަހު) ހަވީރު 4:00 ގައި ތިނަދޫ ސިޓީ ސްޓޭޑިއަމްގައި އަސްކަރީ ހުށަހެޅުންތަކާއި ކުޑަކުދިންގެ ހަވީރެއް ބޭއްވުމަށް ވަނީ ހަމަޖެހިފައެވެ. މި ހަވީރުގައި ކުޑަކުދިންނަށް ޚާއްސަ ގިނަ ހަރަކާތްތަކެއް ހިމެނޭނެއެވެ.

ނަސްރުގެ ދުވަހުގެ ހަރަކާތްތައް ފެށުނީ 2025 ނޮވެންބަރު 3 (ހޯމަ ދުވަހު) ގައި އިސްލާމީ މަރުކަޒުގައި ރައީސުލްޖުމްހޫރިއްޔާ ޑރ. މުޢިއްޒު ބައިވެރިވެވަޑައިގެންނެވި ފަތިސްނަމާދުގެ ޖަމާޢަތާއެކުގައެވެ. އޭގެ ފަހުގައި ކުރިއަށް ގެންދިޔަ ރަސްމީ ހަރަކާތްތަކުގެ ތެރޭގައި ހެނދުނު 6:00 ގައި 3 ނޮވެންބަރުގެ ހަނދާނީ ބިނާގައި ދިދަ ޖެހުމާއި، ގާޑް މައުންޓް ކުރުމުގެ ރަސްމިއްޔާތު ހިމެނެއެވެ. މީގެ އިތުރުން ހެނދުނު 9:00 ގައި ޒުވާނުންގެ މަރުކަޒު (ސޯޝަލް ސެންޓަރ) ގައި އޮތް ރަސްމީ ޖަލްސާވެސް ވަނީ ބާއްވާފައެވެ. ދިވެހިރާއްޖޭގެ ޤައުމީ ދިފާއީ ބާރު (އެމް.އެން.ޑީ.އެފް) އިން އިންތިޒާމުކޮށްގެން ހަވީރު 4:15 ގައި ޖުމްހޫރީ މައިދާނުގައި ބޭއްވި ހަރަކާތެއްގައި، ނިރުބަވެރި ހަމަލާއެއް ނާކާމިޔާބުކޮށްލުމަށް ސިފައިން ކުރާ މަސައްކަތްތައް ހެވިކަމުގެ ހުނަރުތަކުން ދެއްކުންވެސް އޮތެވެ.