ށ. ޅައިމަގު ބަނދަރު ތަރައްގީކުރުމުގެ މަޝްރޫއުގެ 98 އިންސައްތަ މަސައްކަތް ނިމިފައިވާ ކަމަށް އެ މަސައްކަތް ކުރިއަށް ގެންދާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ. އެ ކުންފުނިން ވިދާޅުވީ މިހާރު މަޝްރޫއުގެ ދަށުން ބާކީ ހުރީ ބަނދަރު ސަރަހައްދުގައި ފަތާ ސަރަހައްދު ތަރައްގީ ކުރުމާއި ބަނދަރުގެ މެއިންޓެއިނެސްގެ ބައެއް މަސައްކަތް ކަމަށެވެ.
ޅައިމަގު ބަނދަރު ތަރައްގީ ކުރުމުގެ މަޝްރޫއަކީ އެރަށުގެ ރައްޔިތުންނަށް ވަރަށް މުހިއްމު މަޝްރޫއެކެވެ. މި މަޝްރޫޢުގެ ދަށުން 31،000 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމުގެ މަސައްކަތް ވަނީ ކުރިއަށް ގެންގޮސްފައެވެ. މީގެ އިތުރުން 350 މީޓަރުގެ ބޭރުތޮއްޓާއި، 276 މީޓަރުގެ އެއްގަމުތޮށި ލުމުގެ މަސައްކަތް ވެސް ވަނީ ނިމިފައެވެ.
އެމްޓީސީސީން ހާމަކުރި ގޮތުގައި، މަޝްރޫއުގެ ބޮޑު ބައެއްގެ ގޮތުގައި ހިމެނޭ 500 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 1،380 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމުގެ މަސައްކަތް ވެސް ވަނީ ނިމުމަކާ ގާތްވެފައެވެ. އަދި ބަނދަރުގެ ނެރު ބައްތި އާއި މަގުބައްތި ހަރުކުރުމުގެ މަސައްކަތް ވެސް ކުރިއަށް އެބަދެއެވެ.
މި މަޝްރޫއަކީ 60.7 މިލިއަން ރުފިޔާގެ މަޝްރޫއެކެވެ. ޕްލޭނިން މިނިސްޓްރީން މި މަޝްރޫއު އެމްޓީސީސީއާ ހަވާލުކުރީ ޑިސެމްބަރު 2019 ގައެވެ. 480 ދުވަހުގެ ތެރޭގައި ނިންމަންޖެހޭ ގޮތަށް ހަވާލުކުރި މި މަޝްރޫއުގެ އަމަލީ މަސައްކަތް ފަށާފައިވަނީ 07 ޑިސެމްބަރު 2020 ގައެވެ.
ޅައިމަގު ބަނދަރު ޒަމާނީ ފެންވަރަށް ތަރައްގީވުމަކީ އެރަށު ރައްޔިތުންގެ ވަރަށް ބޮޑު އުންމީދެކެވެ. ކުރިން އެރަށުގެ ބަނދަރު ކުޑަވުމުގެ ސަބަބުންނާއި، ބަނދަރު ފަޅު ތިލަވުމުގެ ސަބަބުން ދޯނިފަހަރަށް ލަފާފުރުމުގައި ވަރަށް ބޮޑަށް ދަތިތައް ކުރިމަތިވެފައިވެއެވެ. 98 އިންސައްތަ މަސައްކަތް ނިމި، މަޝްރޫއު ނިމުމާ ގާތްވެފައިވާއިރު، ރައްޔިތުން މިހާރު ތިބީ ބަނދަރު ބޭނުންކުރަން ފެށޭނެ ދުވަހަކަށް އިންތިޒާރުކުރަމުންނެވެ.
