އައްޑޫ ސިޓީ ހިތަދޫގައި، ދުއްވަމުން ދިޔަ ކާރެއްގައި އަލިފާން ރޯވެއްޖެއެވެ.
އެމްއެންޑީއެފް އިން ބުނީ ހިތަދޫގައި ދުއްވާފައި ދިޔަ ކާރެއްގައި ރޯވެފައިވާ ކަމުގެ މައުލޫމާތު ލިބުނީ ރޭ 10:45 ހާއިރު ހިތަދޫ ފަޔަރ ސްޓޭޝަނަށް ކުރި ރިޕޯޓަކުންކަމަށެވެ. މައުލޫމާތު ލިބުމާއެކު ސަދަން އޭރިއާ ކޮމާންޑް، ހިތަދޫ ފަޔަރ ސްޓޭޝަނުން ވަނީ އެސަަރަހައްދަށް ގޮސް ވަގުތުން އަލިފާންގަނޑު ކޮންޓްރޯލް ކުރުމަށް މަސައްކަތް ފަށާފައިކަމަށްވެސް އެމްއެންޑީއެފް އިންވަނީ ބުނެފައެވެ.
ގާތްގަނޑަކަށް ރޭ 11:10 އެއް 11:11 ހާއިރު ކާރުގައި ރޯވެފައިވާ އަލިފާންގަނޑު ވަނީ ކޮންޓްރޯލު ކުރެވި އަދި މުޅިން ނިއްވާލެވިފައިކަމަށްވެސް އެމްއެންޑީއެފް އިން ހާމަކޮށްފައިވެއެވެ.
އެމްއެންޑީއެފްއިން ބުނީ މިހާދިސާގައި އެއްވެސް މީހަކަށް އަނިޔާވި ކަމުގެ ރިޕޯޓެއް ލިބިފައި ނުވާކަމަށެވެ.
