ޤައުމީ އެއަރލައިން މޯލްޑިވިއަނުން އިންޑިއާގެ ދެ މަންޒިލަކަށް ކުރަމުން އަންނަ ދަތުރުތަކުގެ ޢަދަދު އަންނަ މަހުން ފެށިގެން އިތުރުކުރާ ގޮތަށް ނިންމައިފިއެވެ. މިގޮތުން، ޑިސެމްބަރު މަހުގެ 19 ވަނަ ދުވަހުން ފެށިގެން އިންޑިއާގެ ޓްރިވެންޑްރަމް އަދި ކޮޗިންއަށް ކުރާ ދަތުރުތައް އިތުރުވާނެ ކަމަށް މޯލްޑިވިއަނުން ވަނީ ހާމަކޮށްފައެވެ.
މޯލްޑިވިއަނުން ބުނި ގޮތުގައި، މި ދެ މަންޒިލަށްވެސް މިހާރު ހަފްތާއަކު ކުރަމުން އަންނަ 4 ދަތުރު، ޑިސެމްބަރު 19 އިން ފެށިގެން ހަފްތާއަކު 5 ދަތުރަށް އިތުރުކުރެވޭނެއެވެ. މި އިތުރުވުމާއެކު، ދިވެހިރާއްޖެއާ އިންޑިއާ ދެމެދު ދަތުރުކުރާ ފަރާތްތަކަށް އިތުރު ފަސޭހަތަކެއް ލިބިގެންދާނެއެވެ.
މި އިތުރުކުރެވޭ ދަތުރުތަކަށް ޓިކެޓް ބުކް ކުރުމުގެ ފުރުޞަތު މިހާރު ވަނީ ހުޅުވާލާފައެވެ.
ޤައުމީ އެއަރލައިން މޯލްޑިވިއަނުން މިވަގުތު ބައިނަލްއަޤްވާމީ ޝެޑިއުލް ދަތުރުތައް ކުރަނީ ދެ ޤައުމެއްގެ ފަސް މަންޒިލަކަށެވެ. އެއީ ޗައިނާގެ ތިން ސިޓީއަކަށާއި، އިންޑިއާގެ ޓްރިވެންޑްރަމާއި ކޮޗިންއަށެވެ.
މޯލްޑިވިއަނުން ދަނީ އެ ކުންފުނީގެ ދަތުރުތައް ބައިނަލްއަޤްވާމީ ގިނަ ޤައުމުތަކަކަށް ފުޅާކުރުމުގެ މަސައްކަތް ކުރަމުންނެވެ. އިންޑިއާގެ ދަތުރުތައް އިތުރުކުރުމަކީވެސް މޯލްޑިވިއަންގެ ހިދުމަތްތައް ފުޅާކުރުމަށް ކުރަމުންދާ މަސައްކަތުގެ މުހިންމު ބައެކެވެ.
