ޕަބްލިކް ސަރވިސް މީޑިއާ (ޕީއެސްއެމް) އިން އިސް ނަގައިގެން ރާއްޖޭގެ ގިނަ މީޑިއާތަކަކާ ގުޅިގެން ކުރިއަށް ގެންދާ “ސިލޯނާއާއެކު ދިވެހީން” ޓެލެތޯންގައި، ރާއްޖޭގެ ގައުމީ އެއާލައިން، މޯލްޑިވިއަންއިން 100,000ރ. ހަދިޔާކޮށްފިއެވެ. މި އެހީތެރިކަން ފޯރުކޮށްދިނުމުގެ ގޮތުން މޯލްޑިވިއަންގެ ފަރާތުން ރަމްޒީ ޗެކް ޕީއެސްއެމްއާ ހަވާލުކޮށްދެއްވީ މިއަދު ޓީވީއެމް ސްޓޫޑިއޯގައި ބޭއްވުނު ރަސްމިއްޔާތެއްގައެވެ.
މި ޓެލެތޯނަކީ މިމަހުގެ 26 ވަނަ ދުވަހު ސްރީލަންކާއަށް ކުރިމަތިވި ތޫފާން ޑިޓްވާއާ ގުޅިގެން އެ ގައުމު ކާރިސާގެ ހާލަތަކަށް ވެއްޓި، ގެއްލުން ލިބުނު ފަރާތްތަކަށް އެހީތެރިވުމުގެ ގޮތުން ކުރިއަށް ގެންދާ ހަރަކާތެކެވެ. އަވަށްޓެރި ލަންކާއަށް ދިމާވި ގުދުރަތީ ކާރިސާއާ ގުޅިގެން ދިވެހި ރައްޔިތުންގެ އެހީތެރިކަން ހޯދުމުގެ ގޮތުން އިއްޔެ ހެނދުނު 9:00 ޖެހިއިރު ފެށި މި ޓެލެތޯން މިއަދު މެންދުރު 2:00 ޖެހުމާ ހަމައަށް ކުރިއަށް ގެންދާނެއެވެ. ޖުމްލަ 16 ގަޑިއިރަށް ކުރިއަށް ގެންދާ މި ޓެލެތޯންގައި ސަރުކާރުގެ އެކި އިދާރާތަކާއި ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ކުންފުނިތަކުން ވެސް އަންނަނީ އެހީތެރިކަން ފޯރުކޮށްދެމުންނެވެ.
ޕީއެސްއެމުން އިސްނަގައިގެން ކުރިއަށް ގެންދާ މި ޓެލެތޯންގައި ބައިވެރިވުމުގެ ފުރުސަތު ރާއްޖޭގެ ހުރިހާ ރައްޔިތުންނާއި، ޖަމިއްޔާ ޖަމާއަތްތަކާއި، ކްލަބްތަކާއި، އޮފީސްތައް ފަދަ ހުރިހާ ފަރާތްތަކަށް ވެސް ވަނީ ހުޅުވާލާފައެވެ. މީޑިއާ ޓެލެތޯންއަށް އެހީތެރިވާން ބޭނުންވާ ފަރާތްތަކުން ބީއެމްއެލްގެ އެކައުންޓްތަކަށް އަދި ޓީވީ ބިލްޑިންއާއި މާލޭގެ އެކި ސަރަޙައްދުތަކުގައި ބަހައްޓާފައިވާ ފޮށިތަކަށް އެހީތެރިކަން ފޯރުކޮށްދިނުމުގެ ފުރުސަތު ވަނީ ހުޅުވާލާފައެވެ. މި ޓެލެތޯންގެ ފަންޑު ފޮށިތައް މާލެ އަދި ހުޅުމާލޭގެ 15 ސަރަހައްދެއްގައި ބަހައްޓާފައި ހުރި ކަމަށް ވެސް ޕީއެސްއެމުން ވަނީ ހާމަކޮށްފައެވެ.
