ލޭގައި ހުންނަ ނުރައްކާތެރި ކޮލެސްޓްރޯލް ނުވަތަ އެލް.ޑީ.އެލް (LDL) އަކީ ހިތުގެ ބަލިތަކާއި ސްޓްރޯކް ޖެހުމަށް މަގުފަހިކުރުވާ މައިގަނޑު އެއް ސަބަބެވެ. ދާދިފަހުން ޖަރުމަނުގެ ޔުނިވަރސިޓީ އޮފް ބޮންގެ ސައިންސްވެރިން ކުރި ދިރާސާއަކުން ވަނީ އެންމެ ދެ ދުވަހު އޯޓްސް ކައިގެން ލޭގައި ހުންނަ މި ނުރައްކާތެރި ކޮލެސްޓްރޯލްގެ މިންވަރު ބޮޑުތަނުން ދަށްކުރެވިދާނެކަން ހާމަކޮށްފައެވެ. މިއީ ސިއްހީ ގޮތުން ބޮޑެތި ގޮންޖެހުންތަކާ ކުރިމަތިލާންޖެހިފައިވާ މީހުންނަށް ލިބުނު ވަރަށް އުއްމީދީ ޚަބަރެކެވެ.
ދިރާސާގެ ހޯދުންތަކާއި އޯޓްސްގެ ނަތީޖާ; މި ދިރާސާ ކުރިއަށް ގެންދިޔައީ މެޓަބޮލިކް ސިންޑްރޯމް ނުވަތަ ބަރުދަން އިތުރުވުމާއި، ލޭގެ ޕްރެޝަރު މަތިވުމާއި، ހަކުރު މަތިވުން ފަދަ ސިއްހީ މައްސަލަތައް ހުރި މީހުން ބޭނުންކޮށްގެންނެވެ. ދިރާސާގެ ބައިވެރިން ދެ ދުވަސް ވަންދެން ދުވާލަކު ތިން އިރު ކެއީ ފެނުކެއްކި އޯޓްސްއެވެ. މީގެ ނަތީޖާއެއްގެ ގޮތުން އެމީހުންގެ ހަށިގަނޑުގައި ހުންނަ ނުރައްކާތެރި އެލް.ޑީ.އެލް ކޮލެސްޓްރޯލް 10 އިންސައްތަ ދަށްވެގެން ދިޔައެވެ. އަދި ހަ ހަފުތާ ފަހުން ބެލިއިރުވެސް މި ހެޔޮ ބަދަލު ހަށިގަނޑުގައި ހިފެހެއްޓިފައި ހުރިކަން ސައިންސްވެރިން ފާހަގަކުރިއެވެ. މީގެ އިތުރުން ބައިވެރިންގެ ބަރުދަނުން އެވްރެޖްކޮށް ދެ ކިލޯ ލުއިވެ، ލޭގެ ޕްރެޝަރަށް ވެސް ހެޔޮ ބަދަލެއް އައިސްފައިވެއެވެ.
އޯޓްސްއިން ކޮލެސްޓްރޯލް ދަށްކޮށްދޭ ގޮތް;
އޯޓްސްއަކީ ސިއްހީ ގޮތުން ގިނަގުނަ ފައިދާތަކެއް އެކުލެވިގެންވާ ކާނާއެކެވެ. ޚާއްޞަކޮށް ލޭގައި ހުންނަ ނުރައްކާތެރި ކޮލެސްޓްރޯލް ދަށްކުރުމުގައި އޯޓްސް މުހިންމު ދައުރެއް އަދާކުރެއެވެ. އޯޓްސްއިން ކޮލެސްޓްރޯލް ދަށްކޮށްދޭ މައިގަނޑު ގޮތްތަކަކީ:
ކޮލެސްޓްރޯލް ދަށްކޮށްދޭ މައިގަނޑު ސަބަބުތައް
- ބަނޑުގެ ބެކްޓީރިއާއަށް އަންނަ ބަދަލު: އޯޓްސް ކެއުމުން ބަނޑުގެ ތެރޭގައި ހުންނަ ފައިދާހުރި ބެކްޓީރިއާތަކަށް ހެޔޮ ބަދަލުތަކެއް އާދެއެވެ.
- މެޓަބޮލިޒަމް ރަނގަޅުވުން: ބަނޑުގައި ހުންނަ ބެކްޓީރިއާތަކުން އޯޓްސް ހަޖަމުކުރާއިރު އުފައްދާ މާއްދާތަކުގެ ސަބަބުން ހަށިގަނޑުގެ ކޮލެސްޓްރޯލް މެޓަބޮލިޒަމް ރަނގަޅުވެއެވެ.
- ފައިބަރުގެ އެހީ: އޯޓްސްގައި ހިމެނޭ ގިނަ އަދަދެއްގެ ފައިބަރުގެ ސަބަބުން، ހަށިގަނޑަށް ކޮލެސްޓްރޯލް ދަމައިގަތުން ހުއްޓުވައިދެއެވެ.
- އިންސިއުލިން ރެސިސްޓެންސް: އޯޓްސް ބޭނުންކުރުމުން އިންސިއުލިން ރެސިސްޓެންސް ކުޑަކޮށްދީ، ހަކުރުގެ މިންވަރު ކޮންޓްރޯލްކުރުމަށް އެހީތެރިވެދެއެވެ.
- ބަރުދަން ލުއިވުން: އޯޓްސް ކެއުމުން ބަނޑުފުރިފައި ހުންނަ އިހުސާސް ގިނައިރުވުމުގެ ސަބަބުން ބަރުދަން ލުއިވުމަށް މަގުފަހިވެ، މީގެ ސަބަބުން ކޮލެސްޓްރޯލަށް ހެޔޮ ބަދަލެއް އާދެއެވެ.
ދިރާސާތަކުން ދައްކާގޮތުގައި، ދިގު މުއްދަތަކަށް ކުޑަ އޯޓްސްކޮޅެއް ކެއުމަށްވުރެ، ކުރު މުއްދަތަކަށް ގިނައިން އޯޓްސް ކެއުމުން ކޮލެސްޓްރޯލް ދަށްވުމުގެ ނަތީޖާ މާ އަވަހަށް ފެނެއެވެ.
ޕޯޓްފޯލިއޯ ޑައިޓާއި ދިރިއުޅުމުގެ އާދަތައް; ކޮލެސްޓްރޯލް ދަށްކުރުމަށްޓަކައި ‘ޕޯޓްފޯލިއޯ ޑައިޓް’ އަކީ ވެސް ވަރަށް ފައިދާހުރި ނިޒާމެކެވެ. ގަސްގަހާގެހިން ލިބޭ ބާވަތްތަކުގެ މައްޗަށް ބިނާވެފައިވާ މި ޑައިޓްގެ ނަތީޖާ ބައެއް ބޭސްތަކާ އެއްވަރުވެއެވެ. މި ޑައިޓްގައި ހިމެނޭ ފައިބަރުގެ ބާވަތްތަކުން ހަށިގަނޑަށް ކޮލެސްޓްރޯލް ދަމައިގަތުން ހުއްޓުވައިދޭއިރު، ސޯޔާ ޕްރޮޓީންގެ ސަބަބުން ފުރަމޭގައި ހުންނަ ކޮލެސްޓްރޯލް ރިސެޕްޓަރުތައް އިތުރުކޮށްދެއެވެ. ދިރިއުޅުމުގެ އާދަތަކަށް ބަދަލު ގެނައުމުގެ ގޮތުން ކޮންމެ ދުވަހަކުވެސް މަދު މިންވަރަކަށް ބާދާމް ނުވަތަ ވޯލްނަޓް ކެއުމާއި، ރަތް މަހުގެ ބަދަލުގައި ތަރުކާރީ އާއި މުގު ބޭނުންކުރުން މުހިންމެވެ.
އޯޓްސް ފަދަ އާދައިގެ ކާނާއަކުން ލޭގެ ކޮލެސްޓްރޯލަށް މިފަދަ ބޮޑު ބަދަލެއް އައުމަކީ ސިއްހީ ގޮތުން ލިބޭ ވަރަށް ބޮޑު ކުރިއެރުމެކެވެ.
ނަމަވެސް، މިއީ ޑޮކްޓަރުން ދީފައިވާ ބޭސްތައް ބޭނުންކުރުން ހުއްޓާލުމަށްފަހު ކުރަންޖެހޭ ކަމެއް ނޫނެވެ. ކޮލެސްޓްރޯލް ދަށްކުރުމަށްޓަކައި ކާނާގެ ނިޒާމަށް ބަދަލު ގެނައުމާއެކު، ސަރުބީ ގިނަ ކާނާއާއި ހަކުރު ގިނަ ބުއިންތަކާ ދުރުހެލިވުމަކީ ދިގު މުއްދަތަކަށް ދުޅަހެޔޮ ސިއްހަތެއްގައި ހުރުމަށް ކުރެވިދާނެ އެންމެ މުހިންމު ކަންތައްތަކެވެ.
