50 ބަނގުރާފުޅިއާއިއެކު އައްޑޫ ސިޓީ ހިތަދޫއިން ހައްޔަރު ކުރި މީހަކު، ހިތަދޫ މެޖިސްޓްރޭޓް ކޯޓުން ދޫކޮށްލައިފިއެވެ.
އެ ރަށު ފުލުހުން ހިންގި ހާއްސަ އޮޕަރޭޝަންއެއްގެ ދަށުން އެމީހާ ހައްޔަރުކޮށްފައިވަނީ، ހިތަދޫއަށް ބަނގުރާ އެތެރެކުރަން އުޅޭކަމަށް ލިބުނު އިންޓެލިޖެންސް މައުލޫމާތަކާ ގުޅިގެންނެވެ.
ފުލުހުން ހާމަކޮށްފައިވާ ގޮތުގައި، ޕޮލިސް ސްޓޭޝަނާއި އިންޓެލިޖެންސް ގުޅިގެން އީދު ވިލޭރޭ ކުރިއަށް ގެންދިޔަ އެ އޮޕަރޭޝަނުގައި ހައްޔަރުކޮށްފައިވަނީ 43 އަހަރުގެ ދިވެހި ފިރިހެނެކެވެ. އެގޮތުން އެ މިހާ ހައްޔަރުކުރެވިފައިވަނި ހިތަދޫ ވަލުތެރެއިންނެވެ. ހައްޔަރުކުރުމަށްފަހު އޭނާ ގެންގުޅުނު ތަކެތި ބަލާ ފާސްކުރިއިރު، 50 ފުޅި ބަނގުރާ ފެނިފައިވާ ކަމަށް ފުލުހުން ބުނެ އެވެ.
ނަމަވެސް އެ މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ހިތަދޫ މެޖިސްޓްރޭޓް ކޯޓަށް ހާޒިރުކުރުމުން ކޯޓުން ވަނީ އޭނާ ދޫކޮށްލާފަ އެވެ. ކޯޓުން އޭނާ ދޫކޮށްލީ ކީއްވެ ކަމެއް ސާފެއް ނޫނެވެ.
މީގެ އިތުރުން، މިދިޔަ އާދިއްޔަ ދުވަހު ކުރިއަށް ގެންދިޔަ އޮޕަރޭޝަނެއްގައި، ބަނގުރާ ކެއްކުމަށް ބޭނުންކުރާ ކަމަށް ބެލެވޭ ތަކެތި ހިތަދޫ ވަލުތެރެއިން ހޯދައި ފުލުހުންގެ ބެލުމުގެ ދަށަށް ގެނެސްފައިވެ އެވެ. އެ އޮޕަރޭޝަންއާއި ގުޅިގެން މީހަކު ހައްޔަރުކޮށްފައެއް ނުވެ އެވެ.
ފުލުހުން ބުނި ގޮތުގައި ހިތަދޫ ޕޮލިސް ސްޓޭޝަނުން ކުރިއަށް ގެންދާ އެ އޮޕަރޭޝަންތަކަކީ އީދު ބަންދަކީ ރައްޔިތުންނަށް ރައްކާތެރި ކަމާއެކު ހޭދަކުރެވޭނެ އީދަކަށް ހެދުމަށާއި ބަނގުރަލުގެ މައްސަލަތައް ހުއްޓުވުމަށް ކުރިއަށް ގެންދާ އޮޕަރޭޝަންތަކެއްކަމަށެވެ.
