އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެވިފައިވާ ތަކެތީގެ ތެރެއިން ގދ. އަތޮޅު ޕޮލިސް ސްޓޭޝަނުގައި ހުރި ގިނަ އަދަދެއްގެ ބަނގުރާ ފުޅި ތަކެއް ނައްތާލައިފިއެވެ.
އެގޮތުން މިއަަދު ވަނީ 82 ފުޅި ބަނގުރާ ނައްތާލައިފައެވެ. މިތަކެއްޗަކީ މިދިޔަ އަހަރުގެ ސެޕްޓެމްބަރު މަހުން ފެށިގެން މި އަހަރުގެ އެޕްރިލް މަހުގެ ނިޔަލަށް ގދ. ކާޑެއްދޫ ޑޮމެސްޓިކް އެއާޕޯޓު އަދި ގދ. ފަރެސްމާތޮޑާ ޑޮމެސްޓިކް އެއާޕޯޓުން ފުރަންދިޔަ ފަތުރުވެރިންގެ އަތުން އެމްއެންޑީއެފް އިން ހިފަހައްޓާ ފުލުހުންނާއި ހަވާލުކޮށްފައިވާ ތަކެއްޗެވެ.
ބަނގުރާ ނައްތާލުން ކުރިއަށް ގެންގޮސްފައިވަނީ ފުލުހުންގެ ބެލުމުގެ ދަށަށް ގެނެވޭ ބަނގުރަލާއި، ބަނގުރާގެ މައްސަލަތަކާއި ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާނެ ގޮތުގެ ގަވައިދުގެ ދަށުން އެކަމަށްޓަކައި އެކުލެވިފައިވާ ކޮމެޓީގެ ބެލުމުގެ ދަށުން، ގދ. ތިނަދޫ ޕޮލިސް ސްޓޭޝަނުގައެވެ.
