އިނގިރޭސި ބަހުގެ އިތުރުން ބަންގާޅު ބަހުންވެސް ހުކުރު ޚުތުބާތަކުގެ ތަރުޖަމާ ދަނީ ތައްޔާރުވަމުން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޝަހީމް ފާހަގަ ކުރެއްވީ އިސްލާމްދީނަކީ ޢާލަމީ ރިސާލަތެއް ކަމަށާއި، ޚުޠުބާގައި އަންނަ ވާހަކަތަށް ދިވެހި ރައްޔިތުންގެ އިތުރުން ރާއްޖޭގައި އުޅޭ ބިދޭސީ މުސްލިމުންނަށް އެނގުމަކީ މުހިންމުކަމެއް ކަމަށެވެ. މިހެންކަމުން އިނގިރޭސިބަހާއި ބަންގާޅު ބަހުން ވެސް ރާއްޖޭގެ ޚުޠުބާވަނީ ތަރުޖަމާކުރެވެން ފަށާފައި ކަމަށެވެ.
މިއަދުގެ ޚުޠުބާގެ އިނގިރޭސި ތަރުޖަމާ ވުޒާރާގެ ފޭސްބުކް ޕޭޖުގެ ލައިވް އަދި އިސްލާމީ މަރުކަޒުގައި ބަހައްޓާފައިވާ ޓީވީތަކުން ވަނީ ގެނެސްދީފައެވެ. އަދި ކުރިއަށް އޮތް ހަފްތާއިން ފެށިގެން ޓީވީ ޗެނަލްތަކަށްވެސް ތަރުޖަމާގެ ފީޑު ދޭ ގޮތަށް ހަމަޖެހިފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވަނީ ވިދާޅުވެފައެވެ.
