މިއަހަރުގެ ނޮވެމްބަރު 17 ގެ ކުރިން 3 މިސްކިތެއްގެ މަސައްކަތް ނިންމޭ ވަރަށް މަސައްކަތްތައް ކުރިއަށްދާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ބުދަ ދުވަހު ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ވިދާޅުވީ، މިހާރު ކުރިއަށްދާ 22 މިސްކިތް މަޝްރޫޢުތަކުގެ ތެރެއިން 3 މިސްކިތެއްގެ މަސައްކަތް މިއަހަރުގެ ނޮވެމްބަރު 17 ގެ ކުރިން ނިންމޭ ވަރަށް މަސައްކަތްތައް ކުރިއަށް ދާކަމަށެވެ. އެ ތިން މިސްކިތަކީ އދ. ދިގުރަށުގައި އިމާރާތް ކުރަމުންދާ މިސްކިތާއި ނ. މަނަދޫގައި އިމާރާތްކުރަމުންދާ މިސްކިތާއި ހދ. ހިރިމަރަދޫގައި އިމާރާތް ކުރަމުންދާ މިސްކިތެވެ.
އިސްލާމީ ކަންތައްތަކާ ބެހޭ ވުޒާރާގެ ބެލުމުގެ ދަށުން މިހާރު 22 މިސްކިތެއްގެ މަސައްކަތް ކުރިއަށްދާއިރު، މިސްކިތްތަކުގެ މަސައްކަތްތައް ހަލުވި ކުރުމަށް ވުޒާރާއިން އަންނަނީ ގިނަ މަސައްކަތްތަކެއް ކުރަމުންނެވެ.
