އަވަށްޓެރި ސްރީލަންކާގެ ރިޔާސީ އިންތިޚާބު ކާމިޔާބު ކުރެއްވި އަނޫރާ ކުމާރަ ދިސަނަޔަކައަށް ރައީސް ޑރ. މުޙައްމަދު މުޢިއްޒު ތަހުނިޔާ ވިދާޅުވެއްޖެއެވެ.
ސްރީލަންކާގައި ބޭއްވި ރިޔާސީ އިންތިޚާބު ކާމިޔާބު ކުރެއްވުމާ ގުޅިގެން، ޑިމޮކްރެޓިކް ސޯޝަލިސްޓް ރިޕަބްލިކް އޮފް ސްރީލަންކާގެ އިންތިޚާބީ ރައީސް އަނޫރާއަށް ރައީސް ޑރ. މުޢިއްޒު ތަހުނިޔާ ވިދާޅުވީ ސޯޝަލް މީޑިއާ ޕްލެޓްފޯމް އެކްސްގައި މިރޭ ހިއްސާކުރެއްވި ޕޯސްޓެއްގައެވެ.
ރާއްޖެއާއި ސްރީލަންކާއާ ދެމެދު އޮތް ތާރީޚީ އަވަށްޓެރި ގުޅުމުގެ ވާހަކަ ފާހަގަކުރައްވައި ރައީސް ޑރ. މުޢިއްޒު ވިދާޅުވީ ކުރިއަށް އޮތް ތަނުގައި މި ގުޅުން އިތުރަށް ބަދަހިކުރުމަށް މަސައްކަތް ކުރައްވާނެ ކަމަށެވެ.
މީގެއިތުރުން ރައީސް މުޢިއްޒު ވަނީ އިންތިޚާބީ ރައީސް އަނޫރާގެ އާ ދައުރަށް ކާމިޔާބީއަށް އެދިވަޑައިގެންފައެވެ.
