ޝަޚުސު އޮޅުވާލައިގެން ރާއްޖެ އެތެރެވާން މަސައްކަތް ކުރި 3 ބިދޭސީއަކު ހުއްޓުވައިފިއެވެ.
މޯލްޑިވްސް އިމިގްރޭޝަނުން މިއަދު ބުނީ ޝަޚުސު އޮޅުވާލައިގެން ވެލާނާ އިންޓަރނޭޝަނަލް އެއާޕޯޓުން ރާއްޖެ އެތެރެވާން އުޅުނު 3 ބިދޭސީއަކު ހުއްޓުވާފައިވާ ކަމަށެވެ.
ނަމަވެސް އެ މީހުންނަކީ ކޮން ގައުމަކަށް ނިސްބަތްވާ ބައެއް ކަމެއް ނުބުނެއެވެ.
އިމިގްރޭޝަނުން ހާމަކުރި ގޮތުގައި ރާއްޖެ އެތެރެވާން މަސައްކަތް ކުރީ 25 އަހަރުގެ މީހަކާއި 23 އަހަރުގެ މީހަކާއި 21 އަހަރުގެ މީހެކެވެ. މި ތިން މީހުންނަކީ ވެސް ފިރިހެނުންނެވެ.
އިމިގްރޭޝަނުން ބުނީ 25 އަހަރުގެ މީހާ އެތެރެވާން އުޅުނީ މިދިޔަ ޖުލައި 31 ގައި ކަމަށާއި 23 އަހަރުގެ މީހާ އެތެރެވާން އުޅުނީ އޮގަސްޓް 16 ގައި ކަމަށާއި 21 އަހަރުގެ މީހާ އެތެރެވާން އުޅުނީ 18 އޮގަސްޓްގައި ކަމަށެވެ.
ޝަޚުސު އޮޅުވާލައިގެން ރާއްޖެ އެތެރެވާން މަސައްކަތް ކުރި ބިދޭސީން މީގެކުރިން ވެސް ހުއްޓުވާފައިވެއެވެ.
