ކަނޑު ދަތުރުފަތުރާއިބެހޭ ދާއިރާއިން ރާއްޖޭގައި ކިޔެވުމުގެ ފުރުސަތު އޮތީ ފަހިކޮށް ކަމަށާއި، އެކަމަށް ބޭނުންވާ ޒުވާނުންނަށް ފުރުސަތު އެބައޮތް ކަމަށް ހަޔާރ އެޑިއުކޭޝަން މިނިސްޓްރީން ބުނެފިއެވެ.
އެ މިނިސްޓްރީން ބުނީ އެ ދާއިރާއިން ރާއްޖޭގައިވެސް މިހާރުވަނީ ކިޔެވުމުގެ ފުރުސަތުތައް ފަހިވެފައިވާ ކަމަށެވެ.
އެގޮތުން ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) ގެ ސެންޓަރ ފޮރ މެރިޓައިމް ސްޓަޑީޒްގައި، ކަނޑުދަތުރުފަތުރުގެ ދާއިރާއިން ކެރިއަރއެއް ހޯދަން ބޭނުންވާ ފަރާތްތަކަށް އެންމެ ރަނގަޅު ތަޖުރިބާއެއް ފޯރުކޮށްދިނުމަށް ޔުނިވަރސިޓީން ވަނީ ވަރަށް ބޮޑު އިސްކަމެއް ދީފަަކަމަށެވެ. އަދި އެ ދާއިރާތަކުން ތައުލީމް ހާސިލްކޮށް، ޤައުމަށް ބޭނުންވާ މުހިންމު ސިނާއަތުގައި މަސައްކަތް ކުރުން ވަރަށް މުހިންމު ކަމަށްވެސް ބުނެފައި ވެއެެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސިޔާސަތަކީ އިޤްތިޞާދު ބިނާކުރުމުގައި މަސައްކަތްތެރިކަމުގެ ދާއިރާގައި ހަރަކާތްތެރިވާ ދިވެހިން އިތުރުކުރުން ކަމަށާއި، އެދާއިރާތަކުން މީހުންބިނާކުރުން ކަމަށެވެ.
މީގެ އިތުރުން ހުނަރުވެރި ޖީލެއް ބިނާކޮށް ރާއްޖޭގެ ވަޒީފާގެ ބާޒާރުގައި ދިވެހިންގެ ހިއްސާ އިތުރުކުރުން ކަމަށް ވެސް އެމިނިސްޓްރީން ވަނީ ބުނެފައެވެ.
