ރާއްޖޭގެ ކުޅިވަރު ދާއިރާ ހަރުދަނާކުރަން ސަޢޫދީ ޢަރަބިއްޔާއާއެކު ރާއްޖެއިން އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކުރެއްވީ މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން ޢަބްދުﷲ ރާފިޢު މިހާރު ސަޢޫދީއަށް ކުރައްވަމުން ގެންދަވާ ދަތުރުފުޅުގައެވެ.
ސަޢޫދީގެ ވެރިރަށް ރިޔާޟްގައި އިއްޔެ ބޭއްވި ރަސްމިއްޔާތެއްގައި މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންގެ ފަރާތުން ސޮއިކުރެއްވީ މިނިސްޓަރު ޢަބްދުﷲ ރާފިޢުއެވެ. ސަޢޫދީ ސަރުކާރުގެ ފަރާތުން ސޮއިކުރެއްވީ އެ ގައުމުގެ ސްޕޯޓްސް މިނިސްޓަރު ޕްރިންސް ޢަބްދުލްޢަޒީޒް ބިން ތުރުކީ އަލް ފައިޞަލެވެ.
މި އެއްބަސްވުމުގެ ދަށުން ދެ ގައުމުގެ ކުޅިވަރު ކްލަބްތަކުގެ މެދުގައި ސީދާ މުއާމަލާތުކުރުމަށް އެހީތެރިވުމުގެ އިތުރުން ސްޕޯޓްސް މެޑިސިންއާއި، އެންޓި-ޑޯޕިންއާ ގުޅޭ ކަންކަމާއި އަދި މުބާރާތްތައް އިންތިޒާމުކުރުން ހިމެނެއެވެ.
މީގެއިތުރުން ކުޅިވަރު ހަރަކާތްތައް ބޭއްވުމާއި، ކުޅިވަރާ ގުޅޭ ދާއިރާތަކުން އެއްބާރުލުންދިނުން ހިމެެނެއެވެ. އަދި ޕްރޮފެޝަނަލް ކޯޗުން ތަމްރީނުކުރުމާއި، ލައިބްރަރީ ރިސޯސަސް ހަރުދަނާކުރުމާއި، ދެ ފަރާތުގެ ކުޅިވަރު ތަޖުރިބާތަކުގެ މައުލޫމާތު ބަދަލުކުރުން ހިމެނެއެވެ.
