އެމަނިކުފާނުގެ ތައުލީމީ ހަޔާތުގައި ހޭދަވެގެންދިޔަ ދުވަސްތަކުގައި ތަފާތު އެކިއެކި ގޮންޖެހުންތައް ކުރިމަތިވި ކަމަށާއި، ނަމަވެސް ކާމިޔާބީ ހާސިލުވެގެން ދިޔައީ، ހިންމަތާ އެކުގައި، ނުގުޑާފަދަ އަޒުމެއްގައި ކުރެވުނު ބުރަ މަސައްކަތުން ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސް މިހެން ވިދާޅުވީ ދިވެހިރާއްޖޭގެ ގައުމީ ޔުނިވަރސިޓީގެ 2024 ވަނަ އަހަރުގެ ދަސްވެނިވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.
ގައުމީ ޔުނިވަރސިޓީގައި ކިޔަވައިގެން، މިއަދު ދަސްވެނިވި 311 ދަސްވެނިންނާ މުޚާތަބުކުރައްވަމުން ރައީސް ވިދާޅުވީ މިއަދާ ހިސާބަށް އާދެވުނީ ވަރަށް ބުރަ މަސައްކަތުން ކަމަށާއި، ތައުލީމީ ހަޔާތުގައި ވަރަށް ގިނަ އަހަރުތަކެއް ހޭދަކުރެއްވި ކަމަށެވެ.
އެގޮތުން ޑިގްރީ އިން ފެށިގެން މާސްޓަރޒް އިން ޕީއެޗްޑީއާ ހަމައަށް ދިއުމުގައި، އިނގިރޭސިވިލާތުގައި 8 އަހަރު ދުވަހު ހޭދަކުރެއްވިއިރު އެކި ތަޖުރިބާތައް ކުރައްވަން ޖެހިވަޑައިގެންނެވި ކަމަށާއި، އެއީ ވަރަށް ވަރަށް ދަތި ދުވަސްތަކެއް ކަމަށް ރައީސް ވިދާޅުވިއެވެ.
އަޅުގަނޑު ހަމަ ހަޔާތުން، އެ ހަނދާން ކުޑަކޮށް އާކޮށްލަން ހިތަށްއަރާ. އެންމެ ފަހު މަރުހަލާ، ޕީއެޗްޑީގެ މަރުހަލާގައި ދިޔައިރުގައި. އަޅުގަނޑު ކިޔެވީ، ސިވިލް އިންޖިނިއަރިންގ ދާއިރާއިން. ކޮންކްރީޓް ޓެކްނޯލޮޖީގެ ދާއިރާއިން ދިރާސާއެއް ހެދީ. ރެޔާއި ދުވާލު ލެބޯޓްރީގައި އުޅެންޖެހުނީ. ވަކި ވައްތަރެއްގެ ސްޕެސިމަންތަކެއް ހަދައިގެން، އޭގެ ދަށަށް ވަދެ އޮވެ، 1.2 މީޓަރު، 1.2 މީޓަރުގެ އެލް. ޝޭޕްގެ ބްލޮކެއް ހަދައި، ވަކި ގޮތަކަށް މިކްސްކޮށްގެން ކޮންކްރީޓް ހަދައިގެން، އޭތި ވަކިގޮތަކަށް ކިޔޯ ކޮށްގެން، އޭގެ މަތީގަޔާއި، އަޑީގަޔާއި، ސަތޭކައަށްވުރެ ގިނަ އެކި ވައްތަރުގެ ޓެމްޕަރޭޗަރ މެޝަރކުރާ ޑިވައިސްތަކާއި، މޫވްމަންޓް މެޝަރކުރާ ޕޮއިންޓްސްތައް އަމިއްލައަށް، ބުރުމާއިން ތޮރުފައިގެން، ހަރުކޮށްގެން، ރެޔާއި ދުވާލު ވަކި ގަޑިތަކެއްގައި، ބިންމަތީ އޮށޯވެ އޮވެގެން، އޭގެން ރީޑިންގ ނަގައިގެން، އެތައް އަހަރެއް ހޭދަކުރީ. އެއީ، ސައިންޓިފިކް ދިރާސާއެއް. އެއަށް ވާގޮތް ބަލަންވެގެން. އޭގައި ބްލޭންކެޓެއް އަޅުވައިގެން، ހޫނުކޮށްގެން، ހޫނު މަޑުކޮށް، ހޫނު މަތިކޮށް ހެދީމަ، ދެން އެވާ ގޮތެއް ބަލައި، މިކަހަލަ ކަންތައްތަކެއް ކުރީ.
ރައީސް ވިދާޅުވީ ދެން އެއާ އެކީގައި އެކަމާ ގުޅޭ ދާއިރާތަކުގެ އެތައް ސަތޭކަ ޕޭޕަރުތައް ކިޔުއްވައި، އޭގެ މައްޗަށް ބިނާކޮށް، ތިއެރޮޓިކަލް އެނަލިސިސްއެއް ހައްދަވައި، އާ އީޖާދެއް ކުރައްވަން ޖެހިވަޑައިގެންނެވިއިރު، އެ މަސައްކަތުގައި އެތައް ދުވަހެއް ހޭދަވި ކަމަށެވެ. އަދި އެ މަސައްކަތް ކާމިޔާބު ކުރުމުގައި، އެންމެފަހު މަރުހަލާއަށް ދިޔައިރުގައި، އެންމެފަހު ހަތަރު މަސްދުވަހު، މަސައްކަތަށް ވަގުތުދެއްވުމަށްޓަކައި އާއިލާ ވެސް މާލެއަށް ބަދަލުކުުރެއްވި ކަމަށެވެ.
އެގޮތުން އެ ހަތަރު މަސްދުވަހު ކޮންމެ ދުވަހަކު 20 ގަޑިއިރު ވަންދެން ޔުނިވަރސިޓީގައި މަސައްކަތުގައި އުޅުއްވި ކަމަށާއި، ކޮންމެ ދުވަހަކު ވެސް ނިދިކުރައްވަނީ ދެ ގަޑިއިރު ނުވަތަ ތިން ގަޑިއިރު ކަމަށް ރައީސް ވިދާޅުވިއެވެ.
އެ މަސައްކަތް އިރާދަކުރެއްވީތީ ކޮށް ނިމުނީމާ، އެކްސްޓަރނަލް އެގްޒެމިނަރ ބުނި ހަނދާން އަދިވެސް އެބަހުރި. ތިމަންނަ އެއްކޮޅުން އަނެއްކޮޅަށް ތިއަރެޓިކަލް އެނަލިސިސް ކިޔާކިޔާވެސް މިސްޓޭކެއް ނުފެނުނޭ. ކިހިނެއްހޭ ހެދީ. އަޅުގަނޑު ދެންނެވީ، ސުޕަވައިޒަރުގެ އެހީތެރިކަމާއެކީގައި، އެ ދިން ސަޕޯޓާއެކީގައި ދެން އަޅުގަނޑު، އެ ގައިޑަންސާ އެކީގައި މަސައްކަތް ކުރީއޭ. ވަރަށް ރަނގަޅު ބޭފުޅެއް ހުންނެވީ. އޭރުގެ ހަނދާންތައް އާކުރައްވަމުން ރައީސް ވިދާޅުވިއެވެ.
ރައީސް ވިދާޅުވީ ތިމާ ދާން ބޭނުންވާ ހިސާބަށް ދިއުމުގައި ހިންމަތާއެކީގައި، ވަރުގަދަ އަޒުމަކާ އެކީގައި މަސައްކަތް ކުރީމާ ނަތީޖާ ރަނގަޅުވާނެ ކަމަށެވެ.
ހުރިހާ އެއްޗަކީ ވެސް ނަތީޖާ ކަމަށާއި، ދެން އެ މީހާ އިތުރު ހިތްވަރަކާ އެކީގައި، ދެން އޮތް ހަރުފަތަކަށް ދާން މަސައްކަތް ކުރަންޖެހޭނީ އެ ނަތީޖާގެ މައްޗަށް ކަމަށް އެމަނިކުފާނު ވިދާޅުވިއެވެ.
… [އަޅުގަނޑަށް] ކާމިޔާބީ ހާސިލުވެގެން ދިޔައީ، ހިންމަތާ އެކުގައި، ނުގުޑާފަދަ އަޒުމެއްގައި ކުރެވުނު މަސައްކަތުން، އެތައް ބައެއްގެ އެހީތެރިކަމާ އެކީގައި. ވަރަށް ދަތި ދުވަސްތައް އައި. އެހެންނަމަވެސް، އަޅުގަނޑަށް މުހިންމީ ނަތީޖާ. ހާސިލުކުރަން ދިޔައީ ނަތީޖާ. ރައީސް ވިދާޅުވިއެވެ.
ދަސްވެނިންނާ މުޚާތަބުކުރައްވަމުން ރައީސް އިތުރަށް ވިދާޅުވީ
ހަނދާނަށް ގެންނަންވީ މިއަދާ ހަމައަށް އައުމަށް ކުރި މަސައްކަތް ކަމަށާއި އެއީ، ވަރަށް މުހިންމު ކަމެއް ކަމަށެވެ. ސަބަބަކީ އެހާ ބުރަ މަސައްކަތާ އެކީގައި މަތީ ވަނަތައް ހޯދައިގެން ނުކުމެ، އެ ކުރެވުނު ކަންކަން މަތިން ހަނދާންނުކޮށް ކުރިއަށްދާނަމަ، ގައުމަށް ކޮށްދެވޭނެ ކަމަކީ ކޮބައިތޯ ބަލައި، އެންމެ ރަނގަޅު މިންވަރެއްގައި، އެކަން ކުރުމުގައި ކުރިއަށް ދިއުމަށް އުނދަގޫތަކެއް ކުރިމަތިވުން ކަމަށް ރައީސް ވިދާޅުވިއެވެ.
