ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުހައްމަދު އެއިޑްސް އާއި ހެޕަޓައިޓިސް އަދި ޖިންސީ ގުޅުމުން ފެތުރޭ ބަލިތަކަށް ފަރުވާދިނުމާގުޅޭ ގައިޑްލައިން އިފުތިތާހު ކޮށްދެއްވައިފިއެވެ.
މި ގައިޑްލައިން އިފުތިތާހު ކޮށްދެއްވީ ދުނިޔޭގެ އެއިޑްސް ދުވަސް ފާހަގަކުރުމަށް ބޭއްވުނު ރަސްމިއްޔާތުގައެވެ. ދުނިޔޭގެ އެއިޑްސް ދުވަހުގެ ގޮތުގައި ކޮންމެ އަހަރަކުވެސް ފާހަގަ ކުރަނީ ޑިސެންބަރު މަހުގެ ފުރަތަމަ ދުވަހެވެ.
މެޑަމް ސާޖިދާ، އެއިޑްސް އާއި ހެޕަޓައިޓިސް އަދި ޖިންސީ ގުޅުމުން ފެތުރޭ ބަލިތަކަށް ފަރުވާދިނުމާގުޅޭ ގައިޑްލައިން އިފުތިތާހު ކޮށްދެއްވުން / ފޮޓޯ:ރައީސްއޮފީސް
ރަސްމިއްޔާތުގައި އެއިޑްސް ބައްޔަށް ފަރުވާދިނުމާގުޅޭ ގައިޑްލައިންގެ އިތުރުން ވައިރަލް ހެޕަޓައިޓިސްއާއި އެސްޓީއައިސްގެ ގައިޑްލައިންތައްވެސް އިފުތިތާހު ކޮށްފައިވެއެވެ. އަދި މި ބަލިތަކަށް ފަރުވާކުރުމާއި މުޖުތަމައު ރައްކާތެރިކުރުމަށްކުރެވޭ ކަންތައްތަކާގުޅޭ ޕެނަލް ޑިސްކަޝަނެއް ވެސް ކުރިއަށް ގެންގޮސްފައިވެއެވެ.
މެޑަމް ސާޖިދާ، އެއިޑްސް އާއި ހެޕަޓައިޓިސް އަދި ޖިންސީ ގުޅުމުން ފެތުރޭ ބަލިތަކަށް ފަރުވާދިނުމާގުޅޭ ގައިޑްލައިން އިފުތިތާހު ކޮށްދެއްވުން / ފޮޓޯ:ރައީސްއޮފީސް
އެޗްއައިވީއަށް ފަރުވާ ދިނުމާ ގުޅޭ ގައިޑްލައިން އަލުން އެކުލަވާލާފައި މިވަނީ 9 އަހަރުގެ މެދުކެނޑުމަކަށްފަހުގައެވެ. މި ގައިޑްލައިންތަކަކީ ދުނިޔޭގެ ސިއްހަތު ޖަމިއްޔާގެ އެންމެ ފަހުގެ އިރުޝާދާއި ލަފާގެ މައްޗަށް އެކުލަވާލާފައިވާ ގައިޑްލައިންތަކެކެވެ.
ދުނިޔޭގެ އެއިޑްސް ދުވަސް ފާހަގަ ކުރުމުގެ މަގުސަދަކީ އެއިޑްސް ބައްޔާމެދު މުޖުތަމައު ހޭލުންތެރިކުރުމާއި މި ބަލިން މުޖުތަމަޢު ރައްކާތެރިކުރުމަށްކުރެވޭ މަސައްކަތްތަކުގެ އަގު ވަޒަންކޮށް، އިތުރަށް ކުރެވެންހުރި މަސައްކަތްތައްކުރުމަށް އަޒުމް ކަނޑައެޅުމެވެ.
