މެލޭޝިޔަން އެޔާލައިންސްގެ އެމްއެޗް-370 މަތިންދާބޯޓު ގެއްލުނުތާ ދިހަ އަހަރު ފަހުން އެ އުޅަނދު ހޯދުމުގެ މަސައްކަތް އަލުން ފެށުމަށް މެލޭޝިޔާއިން އެއްބަސް ވެއްޖެއެވެ. މިއީ މުޅިން އައު އުއްމީދެއްގައި އައު އަޒުމެއްގައި ފަށާ މަސައްކަތެކެވެ.
2014 ވަނަ އަހަރުގެ މާރިޗު މަހުގެ 8 ވަނަ ދުވަހު މެލޭޝިޔާއިން ޗައިނާއަށް ދަތުރުކުރަމުންދިޔަ ބޮއިންގ 777 މަތިންދާބޯޓު ވީނުވީއެއް ނޭނގި ގެއްލުނެވެ. އެ މަތިންދާބޯޓުގައި 227 ފަސިންޖަރުންނާއި 12 ފަޅުވެރިން ތިބިއެވެ. ފަސިންޖަރުންގެ ތެރޭގައި ޗައިނާގެ 150 މީހުންނާއި މެލޭޝިޔާގެ 50 މީހުންނާއި އަދި ފަރަންސޭސިވިލާތް، އޮސްޓްރޭލިޔާ، އިންޑޮނޭޝިޔާ، އިންޑިޔާ، އެމެރިކާ، ޔޫކްރެއިން އަދި ކެނެޑާގެ ރައްޔިތުން ހިމެނެއެވެ.
އެމްއެޗް-370 މަތިންދާބޯޓު ގެއްލުނުތާ ދިހަ އަހަރުފުރުން/ ފޮޓޯ:ސެއިސް
މަތިންދާބޯޓުގެ އެންމެ ފަހުގެ ހަބަރު ލިބުނީ ކުއަލަ ލަމްޕޫރުން ފުރިތާ 40 މިނެޓު ފަހުންނެވެ. އޭގެ ފަހުން މަތިންދާބޯޓުގެ ޓްރާންސްޕޮންޑަރު ނިއްވާލެވި، ދަތުރުގެ މަގު ބަދަލުކޮށް، އަންދަމާން ކަނޑުގެ މަތިން ދަތުރު ކުރުމަށްފަހު ދެކުނަށް މިސްރާބު ބަދަލުކޮށްފައިވާކަން ފާހަގަކުރެވުނެވެ. އޭގެ ފަހުން މަތިންދާބޯޓު ވަނީ މުޅިން ގެއްލިފައެވެ. އޭގެ ބައިތަކެއް ކަމަށް ބެލެވޭ އެއްޗެހި އެފްރިކާގެ އައްސޭރިފަށުންނާއި އިންޑިޔާ ކަނޑުގެ ބައެއް ރަށްތަކުން ފެނިފައިވެއެވެ.
އެމްއެޗް-370 މަތިންދާބޯޓު ގެއްލުނުތާ ދިހަ އަހަރުފުރުން/ ފޮޓޯ:ސެއިސް
މެލޭޝިޔާގެ ދަތުރުފަތުރާ ބެހޭ ވަޒީރު އެންތޮނީ ލޮކް ވިދާޅުވީ މަތިންދާބޯޓު ހޯދުމުގެ މަސައްކަތް އަލުން ފެށުމަށް ނިންމާފައިވާ ކަމަށެވެ. އޯޝަން އިންފިނިޓީ ކުންފުނިން ހުށަހެޅި ގޮތުގައި ދެކުނު އިންޑިޔާ ކަނޑުގެ ސަރަހައްދު އަލުން ބަލައި، މަތިންދާބޯޓު ހޯދުމުގެ މަސައްކަތް ކުރިއަށް ގެންދާނެއެވެ.
ކުރިން މެލޭޝިޔާއާއި އޮސްޓްރޭލިޔާއާއި ޗައިނާއާ ގުޅިގެން ދެކުނު އިންޑިޔާ ކަނޑުގެ 120,000 އަކަ ކިލޯމީޓަރުގެ ސަރަޙައްދެއް ބަލާފައިވެއެވެ.
އެމްއެޗް-370 މަތިންދާބޯޓު ގެއްލުނުތާ ދިހަ އަހަރުފުރުން/ ފޮޓޯ:ސައުތުޗައިނާމޯނިންގ
އޭގެ ފަހުން 2018 ވަނަ އަހަރު އޯޝަން އިންފިނިޓީއާ މަސައްކަތް ޙަވާލުކުރެވުނެވެ. ނަމަވެސް އެ މަސައްކަތްތަކުން ވެސް މަތިންދާބޯޓު ހޯދުމުގައި ކާމިޔާބެއް ނުވިއެވެ.
މި ފަހަރުގެ މަސައްކަތުގައި ކުރިއަށް އޮތް 18 މަސް ދުވަހުގެ ތެރޭގައި 15,000 އަކަކިލޯމީޓަރުގެ ސަރަޙައްދެއް ބަލާ، މަތިންދާބޯޓުގެ ބައިތައް ފެނިއްޖެނަމަ އޯޝަން އިންފިނިޓީއަށް 70 މިލިއަން އެމެރިކާ ޑޮލަރު ދޭގޮތަށް ވަނީ ހަމަޖެހިފައެވެ. ނަމަވެސް މަތިންދާބޯޓު ނުފެނިއްޖެނަމަ އެއްވެސް ފައިސާއެއް ދޭކަށް ނުޖެހޭނެއެވެ.
އެމްއެޗް-370 މަތިންދާބޯޓު ގެއްލުނުތާ ދިހަ އަހަރުފުރުން، ގެއްލުނު ބޯޓުގެ ފެނުނު ބައިތައް/ ފޮޓޯ:ސެއިސް
ވަޒީރު ލޮކް ވިދާޅުވީ ގިނަ ތަޖުރިބާކާރުންގެ ލަފާ ހޯދައި، މަތިންދާ ބޯޓު އޮތް ކަމަށް ބެލެވޭ ސަރަހައްދެއް ދެނެގަނެވިފައިވާ ކަމަށެވެ. އޯޝަން އިންފިނިޓީއަށް ވެސް މަތިންދާބޯޓު ހޯދޭނެކަމުގެ ޔަގީންކަން ބޮޑު ކަމަށް އޭނާ ވިދާޅުވިއެވެ. ނަމަވެސް މަތިންދާ ބޯޓު ގެއްލުނުތާ ދިހަ އަހަރު ވެފައިވާތީ، އޭގެ ހުރިހާ ބައިތަކެއް ފެނިދާނެކަމަށް ބުނަން ދަތި ކަމަށް ވެސް އޭނާ ފާހަގަކުރެއްވިއެވެ.
ލޮކް އިތުރަށް ވިދާޅުވީ ސަރުކާރުގެ ޒިންމާއާއި ވާޖިބު އޮތީ މަތިންދާބޯޓުގައި ދަތުރުކުރި މީހުންގެ ޢާއިލާތަކަށް ކަމަށެވެ. މި ފަހަރުގެ މަސައްކަތުން އެދެވޭ ނަތީޖާއެއް ނެރެވި، މަތިންދާބޯޓުގެ ބައިތައް ފެނި، އޭގައި ދަތުރުކުރި މީހުންގެ ޢާއިލާތަކުގެ ހިތްތަކަށް ތަސައްލީއެއް ލިބޭނެ ކަމަށް އުންމީދުކުރައްވާ ކަމަށް ވެސް އޭނާ ވިދާޅުވިއެވެ.
އެމްއެޗް-370 މަތިންދާބޯޓު ގެއްލުނުތާ ދިހަ އަހަރުފުރުން/ ފޮޓޯ:ސެއިސް
2018 ވަނަ އަހަރު ނެރެވުނު 495 ސަފްހާގެ ރިޕޯޓެއްގައި ބުނެފައިވަނީ މަތިންދާބޯޓުގެ ކޮންޓްރޯލްތަކާ ގަސްދުގައި ކުޅެ، ދަތުރު ކުރަމުންދިޔަ މަގު ބަދަލު ކޮށްފައިވާ ކަމަށް ބެލެވޭ ކަމަށެވެ. ނަމަވެސް އެކަން ކުރީ ކޮން ބައެއްކަން ތަހުގީގަށް ހޯދިފައެއް ނުވެއެވެ. އެ ރިޕޯޓުގައި ކަން ހިނގާދިޔަ ގޮތް ކަނޑައެޅިގެން ބަޔާންކޮށްފައެއް ނުވެއެވެ. އެކަމާ ގުޅޭގޮތުން ކަނޑައެޅިގެން އެއްޗެއް ބުނެވޭނީ މަތިންދާބޯޓުގެ ބައިތައް ފެނިގެން ކަމަށް ރިޕޯޓުގައި ފާހަގަކޮށްފައިވެއެވެ. ތަހުގީގު ކުރި ފަރާތުން ވަނީ މަތިންދާބޯޓުގެ ޕައިލެޓުންގެ ފަރާތުން ވެސް ޝައްކު ކުރެވޭ ކަމެއް ފެނިފައި ނުވާ ކަމަށް ބުނެފައެވެ.
އެމްއެޗް-370 މަތިންދާބޯޓު ގެއްލުނުތާ ދިހަ އަހަރުފުރުން/ ފޮޓޯ:ސެއިސް
މެލޭޝިޔަން އެއަރލައިންސްގެ އެމްއެޗް-370 މަތިންދާބޯޓު ގެއްލުނުތާ ދިހަ އަހަރު ފަހުން، އަލުން އެ އުޅަނދު ހޯދުމުގެ މަސައްކަތް ފެށުމަށް މެލޭޝިޔާ ސަރުކާރުން ނިންމާފައިވާކަމީ އުފާވެރި ހަބަރެކެވެ. މި މަސައްކަތުން އެދެވޭ ނަތީޖާއެއް ނެރެވި، މަތިންދާބޯޓުގައި ދަތުރުކުރި މީހުންގެ އާއިލާތަކަށް ހިތްހަމަޖެހުމެއް ލިބި، މި ސިއްރުވެރި ހާދިސާއަށް ޙައްލެއް ލިބޭނެކަމަށް އުންމީދުކުރެވެއެވެ. ނަމަވެސް މަތިންދާބޯޓު ގެއްލުނުތާ ގިނަ ދުވަސްތަކެއް ވެފައިވާތީ، މި މަސައްކަތުގައި ގިނަގުނަ ގޮންޖެހުންތަކެއް ހުރިކަން ފާހަގަކުރެވެއެވެ. އެހެންނަމަވެސް، އައު ޓެކްނޮލޮޖީއާއި ތަޖުރިބާކާރުންގެ ލަފަޔާއެކު މި މަސައްކަތް ކުރިއަށް ގެންދިއުމުން، މަތިންދާބޯޓާ ގުޅޭ އިތުރު މަޢުލޫމާތު ލިބި، މި ސިއްރުވެރި ހާދިސާއަށް އަލިކަމެއް ލިބޭނެކަމަށް އުންމީދުކުރެވެއެވެ.
އެމްއެޗް-370 މަތިންދާބޯޓު ގެއްލުނުތާ ދިހަ އަހަރުފުރުން/ ފޮޓޯ:ސެއިސް
މި މަސައްކަތުގެ ނަތީޖާއަކުން، ވައިގެ ދަތުރުފަތުރުގެ ސަލާމަތާއި ރައްކާތެރިކަން އިތުރަށް ހަރުދަނާކުރުމަށް މުހިންމު މަޢުލޫމާތުތަކެއް ލިބި، މުސްތަގުބަލުގައި މިފަދަ ހާދިސާތައް ހުއްޓުވުމަށް އެޅިދާނެ ފިޔަވަޅުތަކެއް ދެނެގަނެވިދާނެއެވެ. އަދި މީގެ އިތުރުން، މި މަސައްކަތުގެ ތެރެއިން ކަނޑުއަޑީގެ ދިރާސާތަކަށާއި ހޯދުންތަކަށް ވެސް އައު ހޯދުންތަކެއް ލިބިދާނެކަމަށް ބެލެވެއެވެ.
ނަމަވެސް، މި މަސައްކަތުގެ އެންމެ މުހިންމު ނަތީޖާއަކަށް ވާނީ މަތިންދާބޯޓުގައި ދަތުރުކުރި މީހުންގެ އާއިލާތަކަށް ލިބޭނެ ހިތްހަމަޖެހުމެވެ. އެ ޢާއިލާތަކަށް ލިބިފައިވާ ވޭނާއި ހިތާމައަށް ނިމުމެއް ގެނެސް، އެ މީހުންގެ ލޮބުވެތިންނަށް ވީގޮތެއް އެނގި، އެކަމާ ކުރިމަތިލުމުގެ ފުރުޞަތު ލިބުމަކީ އެ އާއިލާތަކަށް ލިބޭނެ ވަރަށް ބޮޑު ހިތްހަމަޖެހުމަކަށް ވާނެއެވެ.
