ގެދޮރުވެރިޔާ ފްލެޓްތަކަށް އަލުން ހުށަހެޅުމުގެ ފުރުޞަތު ހުޅުވާލާފައިވާކަމަށް ބުނެ، ފޮނުވަމުންދަނީ ސައްޙަ ނޫން މެސެޖުތަކެއް ކަމަށާއި އެކަމަށް ސަމާލުވުމަށް ފުލުހުން އިލްތިމާސްކުރައްވައިފިއެވެ.
ސޯޝަލް މީޑިއާގައި ހިއްސާ ކޮށްފައިވާ ޕޯސްޓެއްގައި ފުލުހުންގެ ޚިދުމަތުން ވިދާޅުވީ ހައުސިންގ މިނިސްޓްރީގެ ހުރިހާ ލިޔެކިޔުންތަކެއް އެނދުމާ ގުޅިގެން ގެދޮރުވެރިޔާ ފްލެޓްތަކަށް އަލުން ފޯމު ލުމުގެ ފުރުޞަތު އެވުޒާރާއިން ހުޅުވާލާފައިވާކަމަށް ބުނެ، ލިންކަކާއެކު ފޮނުވަމުންދާ މެސެޖަކީ ސައްޙަ މެސެޖެއްނޫންކަމަށެވެ.
މިމަހުގެ 12 ވަނަ ދުވަހު ހިނގި އަލިފާނުގެ ހާދިސާގައި ގެދޮރުވެރިކަމާއި ބިމާއި އުމްރާނީ ތަރައްޤީއާބެހޭ ވުޒާރާއާއި އިމާރާތްކުރުމާއި ބިނާރާބެހޭ ވުޒާރާ ހިންގަމުންދިޔަ އިމާރާތް ބޭނުން ނުކުރެވޭ ވަރަށް އަނދައިފައިވާއިރު އެ ހާދިސާއާ ގުޅިގެން ގެދޮރުވެރިކަމާއި ގުޅޭ އެއްވެސް ސްކީމެއްގެ ލިޔެކިއުމަކަށް އަސަރުނުކުރާ ކަމުގެ ޔަޤީންކަން ވުޒާރާއިން ވަނީ ދެއްވާފައެވެ.
