މޯލްޑިވިއަންގެ ވައިޑް-ބޮޑީ މަތިންދާބޯޓުގައި ޗައިނާއަށް ކަނޑު މަހުގެ އުފެއްދުންތައް އެކްސްޕޯޓް ކުރުމަށް ހުރި ފުރުސަތުތަކާ ގުޅޭގޮތުން މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއާއި، މިފްކޯ، އެމްއެސްއެސް، މޯލްޑިވިއަން އަދި މަސްވެރިކަމުގެ ސިނާއަތުގައި ހަރަކާތްތެރިވާ ވިޔަފާރިތަކާއެކު މަޝްވަރާ ބައްދަލުވުމެއް ބާއްވައިފިއެވެ.
މަސްވެރިކަމާބެހޭ ވުޒާރާއިން މަޢުލޫމާތު ދެއްވިގޮތުގައި މި ބައްދަލުވުމުގެ މައިގަނޑު މަޤްޞަދަކީ މަސްވެރިކަމުގެ ދާއިރާއިން އެކްސްޕޯޓް ކުރުމުގެ ފުރުޞަތުތައް އިތުރުކުރުމެވެ. ޤައުމީ އެއަރލައިން މޯލްޑިވިއަންގެ ސީދާ ދަތުރުތައް ޗައިނާއަށް ފެށިފައިވާއިރު، މި ދަތުރުތަކުގައި މަހުގެ ބާވަތްތައް އެކްސްޕޯޓްކުރެވުމުގެ ސަބަބުން ރާއްޖެއިން ބޭރުކުރާ މުދަލުން ދައުލަތަށް ލިބޭ އާމްދަނީ އިތުރުވެގެންދާނެކަމަށް ބެލެވެއެވެ.
މޯލްޑިވިއަންގެ ފަރާތުން ހާމަކުރި ގޮތުގައި ވައިޑް-ބޮޑީގެ ކޮންމެ ދަތުރެއްގައިވެސް އެއަރ ކާގޯ ގޮތުގައި 10 ޓަނުގެ މުދާ އުފުލުމުގެ ޤާބިލުކަން ލިބިގެންދާނެއެވެ. މިއީ ރާއްޖޭގެ ވިޔަފާރިތަކަށް އިތުރު މަންފާތަކެއް ލިބިގެންދާނެ ކަމެއްގެ ގޮތުގައި މޯލްޑިވިއަނުން ފާހަގަނުން ފާހަގަކުރެއެވެ. މި ދަތުރުތަކުގެ ސަބަބުން ރާއްޖޭގެ ވިޔަފާރިތަކަށް މުދާ އެތެރެކުރުމަށާއި، ރާއްޖޭގެ މުދާ ޗައިނާގެ މާކެޓަށް ގެންދިއުމަށް އިތުރު ފުރުޞަތުތަކެއް ހުޅުވިގެންދާނެއެވެ.
މިހާރު މޯލްޑިވިއަނުން ޗައިނާގެ 3 މަންޒިލަކަށް ސީދާ ދަތުރުތައް ކުރަމުންދާއިރު، އިތުރު ބޯޓެއް މިއަހަރުގެ އޮކްޓޫބަރު މަހު ރާއްޖެ ގެނައުމަށް ހަމަޖެހިފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އިޢުލާންކުރައްވާފައެވެ. އަދި ދަތުރުތައް އެހެން މަންޒިލްތަކަށްވެސް ފުޅާކުރުމުގެ މަސައްކަތް ކުރަމުންދާ ކަމަށް މޯލްޑިވިއަންއިން ބުނެއެވެ.
މޯލްޑިވިއަންގެ ޚިދުމަތަށް ގެނެސްފައިވާ ވައިޑް-ބޮޑީ މަތިންދާބޯޓަކީ އެއަރބަސް އޭ330ގެ 200 ވޭރިއަންޓްގެ ބޯޓެކެވެ. މި ބޯޓުގައި 264 މީހުންގެ ޖާގަ ހުރިއިރު، ގޮނޑިތައް ޖަހާފައިވަނީ ބިޒްނަސް ކްލާސް، ޕްރިމިއަމް ކްލާސް އަދި އިކޮނޮމީ ކްލާސްގެ 3 ކްލާހަކަށް ބަހާލައިގެންނެވެ.
މި މަޝްވަރާ ބައްދަލުވުމުގައި ބައިވެރިވި ފަރާތްތަކުން، މޯލްޑިވިއަންގެ ވައިޑް-ބޮޑީ މަތިންދާބޯޓުން ޗައިނާއަށް މަސް އެކްސްޕޯޓްކުރުމުގެ ފުރުޞަތުތަކާ ގުޅޭގޮތުން ފުޅާ ދާއިރާއެއްގައި މަޝްވަރާކޮށް، މި ފުރުޞަތުތައް އެންމެ ފުރިހަމަ ގޮތުގައި ބޭނުންކުރުމަށް އެޅިދާނެ ފިޔަވަޅުތަކާ ބެހޭގޮތުން ޚިޔާލު ބަދަލުކުރިއެވެ.
