ރާއްޖެއިން އިތުރު ގައުމުތަކަކަށް ނޮން-ރެސިޑެންޓް ސަފީރުންގެ އައްޔަނުކުރުމަށް 4 ބޭފުޅެއްގެ ނަން ހުށަހަޅައިފި އެވެ.
މިގޮތުން، ބުރުނާއީއަށް ރާއްޖެއިން ކަނޑައަޅާ ނޮން-ރެސިޑެންޓް ސަފީރު ކަމަށް އައްޔަންކުރަން ހުށަހެޅުއްވާފައި ވަނީ މިހާރު މެލޭޝިއާއަށް ކަނޑައަޅުއްވާފައި ހުންނަވާ ސަފީރު، މ. ރުއްފުށި، ޑރ. މަރިޔަމް ޝަބީނާ އަހުމަދުގެ ނަމެވެ.
ލަގްޒަމްބާގް އަދި ނެދަލެންޑްސަށް ރާއްޖެއިން ކަނޑައަޅާ ނޮން-ރެސިޑެންޓް ސަފީރު ކަމަށް އައްޔަންކުރަން ހުށަހެޅުއްވާފައިވަނީ މިހާރު ބެލްޖިއަމަށް ކަނޑައަޅުއްވާފައި ހުންނަވާ ސަފީރު، މ. ގީލާވިލާ، ގީލާ އަލީގެ ނަމެވެ.
ފްރާންސްގެ ނޮން-ރެސިޑެންޓް ސަފީރު ކަމަށް އައްޔަންކުރަން ހުށަހެޅުއްވާފައިވަނީ މިހާރު އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު، ހ. އޯކިޑް، އިރުތިޝާމް އާދަމްގެ ނަމެވެ.
އޮސްޓްރޭލިއާގެ ނޮން-ރެސިޑެންޓް ސަފީރު ކަމަށް އައްޔަންކުރަން ހުށަހެޅުއްވާފައިވަނީ މިހާރު ސިންގަޕޫރަށް ކަނޑައަޅުއްވާފައި ހުންނަވާ ސަފީރު، މއ. ދިލާސާ، މުހައްމަދު ލުވޭޒުގެ ނަމެވެ.
މި ނަންތައް ދިރާސާކުރުމަށް ފޮނުވާފައިވަނީ ހާރިޖީ ގުޅުންތަކުގެ ކޮމެޓީއަށް ފޮނުވާފައިވާއިރު، މި ބޭފުޅުންގެ ނަންތައް ރައްޔިތުންގެ މަޖިލީހުގައި ވަނީ އިއްވާފައެވެ.
