މިއަދު އިސްލާމީ މަރުކަޒު ހޯލުގައި ބޭއްވުނު ހާއްސަ ރަސްމިއްޔާތެއްގައި، ހައްޖުގެ އަޅުކަމަށް ފުރާ 500 ހައްޖުވެރިން ގައުމީ އެއާލައިން މޯލްޑިވިއަނުން ދަތުރުތައް ކުރާގޮތަށް އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި ހައްޖުގައި ހައްޖު ކޯޕަރޭޝަންގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ މުޙައްމަދު ޝަކީލެވެ. އަދި މޯލްޑިވިއަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އިބްރާހިމް އިޔާޒެވެ.
ހައްޖު ކޯޕަރޭޝަންގެ މެނޭޖިންގ ޑިރެކްޓަރ ޝަކީލް ވިދާޅުވިގޮތުގައި، މިއަހަރު ރާއްޖެއިން ހައްޖަށް ފުރާ ހައްޖުވެރިންގެ ތެރެއިން 50 އިންސައްތަ ހައްޖުވެރިން ދަތުރުކުރާނީ މޯލްޑިވިއަންގެ ފްލައިޓުގައެވެ. މިއީ ޖުމްލަ 500 ހައްޖުވެރިންނެވެ.
މި ރަސްމިއްޔާތު ޝަރަފުވެރިކޮށްދެއްވި އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ މިއަދަކީ ތާރީޚީ ދުވަހެއް ކަމަށެވެ. އެމަނިކުފާނު ފާހަގަކުރެއްވި ގޮތުގައި، ސަޢޫދީ ސަރުކާރުން ކޮންމެ ޤައުމަކަށްވެސް އެ ޤައުމެއްގެ ޤައުމީ އެއާލައިނުން 50 ޕަސެންޓް ހައްޖުވެރިން އުފުލުމުގެ ހުއްދަ ދީފައިވީނަމަވެސް، ރާއްޖޭގައި މިކަން މީގެ ކުރިން ހަމަޖެހިފައި ނުވާކަމެވެ.
މޯލްޑިވިއަނުން ހައްޖުގެ ދަތުރުތައް ފެށުމުން، ޓްރާންސްޕޯޓަށް ކުރާ ޚަރަދު 3.6 މިލިއަން ރުފިޔާ ކުޑަވާނެ ކަމަށް ޝަކީލް ވިދާޅުވިއެވެ. އަދި ކުރިއަށް އޮތް ތަނުގައި ހުރިހާ ހައްޖުވެރިންވެސް މޯލްޑިވިއަންގެ ފްލައިޓުގައި ސަޢޫދީ ޢަރަބިއްޔާއަށް ގެންދިއުމަކީ އެފަރާތުގެ އުންމީދު ކަމުގައި ވިދާޅުވިއެވެ.
މޯލްޑިވިއަންގެ މެނޭޖިންގ ޑިރެކްޓަރ އިޔާޒް ވިދާޅުވީ މިކަން ހަމަޖެހުމުގެ ފަހަތުގައި ރައީސް ޑރ. މުޙައްމަދު މުޢިއްޒުގެ އިސްނެންގެވުން ބޮޑު ކަމަށެވެ. އަދި މި ޚިދުމަތް ފޯރުކޮށްދިނުމަށް މަސައްކަތްކުރެއްވި އެންމެހާ ފަރާތްތަކަށް ޝުކުރު އަދާކުރެއްވިއެވެ.
މީގެ އިތުރުން، އުމްރާ ދަތުރުތައްވެސް މޯލްޑިވިއަންގައި ކުރުމަށް އެ އެއާލައިނުގެ އިސްވެރިންނާ މަޝްވަރާކުރަމުންދާ ކަމަށް ޝަކީލް ހާމަކުރެއްވިއެވެ.
