ކުރިއަށް އޮތް ރަމަޟާން މަހު މާލޭގެ މަގުތަކުގައި ބަރު އުޅަނދުފަހަރާއި މުދާ އުފުލާ އުޅަނދުފަހަރު ދުއްވޭނެ ގަޑިތައް މިނިސްޓްރީ އޮފް އިކޮނޮމިކް ޑިވެލޮޕްމަންޓުން އިޢުލާނުކޮށްފިއެވެ.
މިނިސްޓްރީން ކަނޑައެޅި ގަޑިތަކަށް ބަލާއިރު، ރަމަޟާން މަހުގެ ފުރަތަމަ 19 ދުވަހު މާލޭގެ މަގުތަކުގައި ބަރު އުޅަނދުފަހަރާއި މުދާ އުފުލާ އުޅަނދުފަހަރު ދުއްވޭނީ ހެނދުނު 9:30 އިން ހަވީރު 16:30 އަށާއި، ރޭގަނޑު 20:00 އިން ހެނދުނު 6:00 އަށެވެ.
ނަމަވެސް ރަމަޟާން މަހުގެ ފަހު ދިހައެއްގައި އިތުރު ބަދަލުތަކެއް ގެނެސްފައިވެއެވެ. މިގޮތުން ފަހު ދިހައެއްގައި ހަވީރު 16:30 އިން ފެށިގެން ރޭގަނޑު 20:00 އާ ދެމެދު މާލޭގެ މަގުތަކުގައި ބަރު އުޅަނދުފަހަރާއި މުދާ އުފުލާ އުޅަނދުފަހަރު ދުއްވުން ވަނީ މަނާކޮށްފައެވެ.
މި އުސޫލަށް ޢަމަލުކުރުން ކުރިއަށް ދާނީ ޢީދު ދުވަހުން ފެށިގެން ޝައްވާލު މަހުގެ 7 ވަނަ ދުވަހުގެ ނިޔަލަށެވެ. މިއީ ރަމަޟާން މަހު މާލޭގެ މަގުތަކުގައި ޓްރެފިކް ތޮއްޖެހުން ކުޑަކޮށް، ރައްޔިތުންނަށް ފަސޭހަކަމާއެކު ދަތުރުފަތުރު ކުރެވޭނެ މާހައުލެއް ޤާއިމުކުރުމަށް އެޅޭ ފިޔަވަޅެކެވެ.
