މޯލްޑިވިއަން އެއަރލައިންސްއިން “ހިނިތުންވުމާއެކު ގައުމީ އެއަރލައިން” ނަމުގައި ފަށާފައިވާ އައު ކެމްޕެއިންގެ ފުރަތަމަ ހަރަކާތް އިއްޔެ ފުވައްމުލައް ސިޓީގައި ކުރިއަށް ގެންގޮސްފިއެވެ. މި ހަރަކާތް ކުރިއަށް ގެންދިޔައީ ފުވައްމުލައް ސިޓީ ކައުންސިލާއި އަތޮޅު ތައުލީމީ މަރުކަޒާ ގުޅިގެންނެވެ.
މި ކެމްޕެއިންގެ މަޤްޞަދަކީ ޕޮޒިޓިވް ކަލްޗަރއެއް ބިނާކުރުމާއި މުޖުތަމަޢުއަށް އެކި ދާއިރާތަކުން އެހީތެރިކަން ފޯރުކޮށްދިނުމެވެ. ފުވައްމުލަކުގައި ބޭއްވުނު މި ހަރަކާތުގައި ތިން ސްކޫލެއްގެ 65 ދަރިވަރުން ބައިވެރިވިއެވެ. މި ހަރަކާތުގައި ދަރިވަރުންނަށް ވަޒީފާއަށް ތައްޔާރުވުމުގެ ހުނަރު ދަސްކޮށްދިނުމާއެކު، މޯލްޑިވިއަންގެ ވަޒީފާގެ ފުރުޞަތުތަކާ ބެހޭ މަޢުލޫމާތު ފޯރުކޮށްދެވުނެވެ.
ޕީއެސްއެމް ނިއުސްއަށް ވާހަކަދެއްކި ބައެއް ދަރިވަރުން ބުނީ މި ހަރަކާތުން ލިބުނު މަޢުލޫމާތަކީ ވަރަށް މުހިންމު މަޢުލޫމާތުތަކެއް ކަމަށެވެ. “މި ސެޝަންއިން ވަރަށް މުހިންމު މަޢުލޫމާތުތަކެއް އެނގިގެން ހިނގައްޖެ. ޚާއްޞަކޮށް މޯލްޑިވިއަން އަދި އޭވިއޭޝަން ދާއިރާގެ މަޢުލޫމާތު ފާހަގަކޮށްލަން،” އެއް ދަރިވަރަކު ބުންޏެވެ.
ހަރަކާތުގައި ބައިވެރިވި ދަރިވަރުންނަށް މޯލްޑިވިއަންއިން ވަނީ ޚާއްޞަ ސެޓްފިކެޓެއް ހަވާލުކޮށްފައެވެ. މޯލްޑިވިއަންގެ ފަރާތުން މަޢުލޫމާތު ދެއްވި ބޭފުޅަކު ވިދާޅުވީ މި އަހަރު ތެރޭގައި މި ހަރަކާތް ރާއްޖޭގެ އެކި ސިޓީތަކުގައި ކުރިއަށް ގެންދާނެ ކަމަށެވެ. އަދި މާލެ ސަރަޙައްދުގައާއި މުޖުތަމަޢުގެ އެކި ފަރާތްތަކަށް ބައިވެރިވެވޭނެ އިތުރު ހަރަކާތްތަކެއްވެސް މި ކެމްޕެއިންގެ ދަށުން ކުރިއަށް ގެންދަން ރާވާފައިވާ ކަމަށްވެސް އެ ބޭފުޅާ ވިދާޅުވިއެވެ.
“ހިނިތުންވުމާއެކު ގައުމީ އެއަރލައިން” ކެމްޕެއިންގެ މި ފުރަތަމަ ހަރަކާތް ފުވައްމުލަކުގައި ބޭއްވުމަކީ، ރާއްޖޭގެ އެކި ކަންކޮޅުތންކޮޅުތަކުގައި ދިރިއުޅޭ ޒުވާނުންނަށް އޭވިއޭޝަން ދާއިރާއާ ބެހޭ މަޢުލޫމާތު ފޯރުކޮށްދިނުމަށް މޯލްޑިވިއަންއިން ކުރަމުންދާ މަސައްކަތުގެ މުހިންމު ފިޔަވަޅެކެވެ.
