ޢީދު ބަންދާއި ދިމާކޮށް ޤައުމީ އެއަރލައިން މޯލްޑިވިއަނުން 11 ރަށަކަށް އިތުރު 30 ދަތުރެއް ކުރުމަށް ނިންމައިފިއެވެ. މިއީ ޢީދާ ދިމާކޮށް އިތުރުވާ ޑިމާންޑަށް އަމާޒުކޮށްގެން ރޭވި ދަތުރުތަކެކެވެ.
މޯލްޑިވިއަނުން މަޢުލޫމާތު ދެއްވާފައިވާ ގޮތުގައި ފުވައްމުލަކު ސިޓީއަށް އިތުރު ފަސް ދަތުރު ހަމަޖެހިފައިވާއިރު، އައްޑޫ ސިޓީ ގަމަށްވެސް އާންމު ޝެޑިއުލްގެ އިތުރުން ދަތުރުތަކެއް ކުރުމަށް ވަނީ ހަމަޖެހިފައެވެ. މިހާރުވެސް ގަމަށް ދުވާލަކު ތިން ދަތުރު ކުރަމުންދެއެވެ.
އިތުރު ދަތުރުތައް ހަމަޖެހިފައިވާ ރަށްތަކުގެ ތެރޭގައި ހއ. ހޯރަފުށި، ހދ. ހަނިމާދޫ، ހދ. ކުޅުދުއްފުށި، ށ. ފުނަދޫ، ލ. ކައްދޫ، ގއ. ކޫއްޑޫ، ގދ. ކާޑެއްދޫ، ގދ. މާވަރުލު އަދި ގދ. ފަރެސްމާތޮޑާ ހިމެނެއެވެ.
ސީޕްލޭން ޚިދުމަތް ފުޅަދޫއަށް
މީގެއިތުރުން، ޢީދާ ދިމާކޮށް މޯލްޑިވިއަންގެ ސީޕްލޭން ޚިދުމަތް ބ. ފުޅަދޫއަށް ފެށުމަށްވެސް ވަނީ ނިންމާފައެވެ. މި ޚިދުމަތް ފެށުމަށް ހަމަޖެހިފައިވަނީ މާރިޗު 31 ވަނަ ދުވަހުން ފެށިގެންނެވެ.
25 ބޯޓުގެ ފްލީޓެއް އޮޕަރޭޓްކުރަމުންދާ މޯލްޑިވިއަނުން ބުނީ، މި އިތުރު ދަތުރުތަކާއެކު ޢީދު ދުވަސްވަރު އިތުރުވާ ޑިމާންޑަށް ފުރިހަމައަށް ޚިދުމަތް ދެވިގެންދާނެ ކަމަށެވެ. އެއަރލައިންގެ ފްލީޓުގައި އޭޓީއާރު، ޑޭޝް8، އޭ320 ނެރޯބޮޑީ އަދި ސީޕްލޭން ބޯޓުތައް ހިމެނެއެވެ.
