ޤައުމީ އެއަރލައިން މޯލްޑިވިއަންގެ އޭ320ގެ ދަތުރުތައް އައްޑޫ ސިޓީ ގަމަށް އަންނަ މަހުގެ 10 ވަނަ ދުވަހު ފެށުމަށް ވަނީ ނިންމާފައެވެ. މި ދަތުރުތައް ކުރިއަށް ގެންދާނީ ހަފްތާއަކު ދެ ދަތުރުގެ މަގުންނެވެ.
މޯލްޑިވިއަންއިން މަޢުލޫމާތު ދެއްވާފައިވާ ގޮތުގައި މާލެއާއި އައްޑޫ ސިޓީ ގަމާ ދެމެދު މި ދަތުރުތައް ކުރިއަށް ގެންދާނީ ކޮންމެ ހަފްތާއެއްގެވެސް ބުރާސްފަތި އަދި ހޮނިހިރު ދުވަހުއެވެ. މިހާރުވެސް މޯލްޑިވިއަންއިން މާލެއާއި ގަމާ ދެމެދު ކޮންމެ ދުވަހަކު ތިން ދަތުރު އެބަ ބާއްވައެވެ.
މި ބޯޓުގެ ދަތުރުތައް މީގެ ކުރިންވެސް އައްޑޫ ސިޓީ ގަމަށް ކުރަމުން އައި ނަމަވެސް، ޝެޑިއުލްޑް މެއިންޓެނެންސްއަށް ވަނީ ހުއްޓާލާފައެވެ. އެއަރލައިނުން ބުނާ ގޮތުގައި އޭ320 އަކީ 152 މީހުންގެ ޖާގައިގެ ބޯޓެކެވެ. މީގެ ތެރޭގައި 14 ބިޒްނަސް ކްލާސް ގޮނޑިއާއި 138 އިކޮނޮމީ ކްލާސް ގޮނޑި ހިމެނެއެވެ.
ޤައުމީ އެއަރލައިން މޯލްޑިވިއަންގެ އޭ320ގެ ދަތުރުތައް އައްޑޫ ސިޓީ ގަމަށް އަންނަ މަހުފަށާނެ/
މޯލްޑިވިއަންގެ ފްލީޓުގައި މިވަގުތު ޖުމުލަ 25 ބޯޓު ހިމެނެއެވެ. މީގެ ތެރޭގައި އެކި ބާވަތުގެ ބޯޓުތައް ހިމެނޭއިރު، އެންމެ ފަހުން ފްލީޓަށް އިތުރުކުރި ވައިޑްބޮޑީ އެއަރބަސް އޭ330 ބޯޓަކީ 264 މީހުންގެ ޖާގައިގެ ބޯޓެކެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދާ އެއްގޮތަށް، މޯލްޑިވިއަންގެ ޚިދުމަތް ފުޅާކޮށް ބައިނަލްއަޤްވާމީ ގިނަ މަންޒިލްތަކަށް ދަތުރުތައް ފެށުމަށް ސަރުކާރުން ދަނީ މަސައްކަތްކުރަމުންނެވެ. މިގޮތުން މިއަހަރުގެ ޖަނަވަރީ 6 ގައި ވައިޑްބޮޑީ އެއަރކްރާފްޓެއް ވަނީ ފްލީޓަށް އިތުރުކޮށްފައެވެ
