ވަކި އުމުރަކުން ފެށިގެން ދުންފަތް ބޭނުންކުރުން މަނާކުރުމާ ގުޅޭގޮތުން ޚިޔާލު ހޯދުމަށް މަދަނީ ޖަމްޢިއްޔާ ޖަމާޢަތްތަކާއެކު ޞިއްޙީ ވުޒާރާއިން މަޝްވަރާ ބައްދަލުވުމެއް ބާއްވައިފިއެވެ.
މި ބައްދަލުވުމުގައި ޖެނެރޭޝަނަލް ބޭން ނުވަތަ ވަކި އުމުރުފުރައަކުން ފެށިގެން ދުންފަތް ބޭނުންކުރުން މަނާކުރުމުގެ ސިޔާސަތު ކާމިޔާބުކަމާއެކު ތަންފީޒުކުރުމުގައި ސަމާލުކަން ދޭންޖެހޭ ކަންކަމާ ގުޅޭގޮތުން މަޝްވަރާކޮށް، ގިނަ ލަފާތަކެއް ލިބިފައިވާކަމަށް އެ ވުޒާރާއިން ވަނީ ހާމަކޮށްފައެވެ،
ދުންފަތުން ރައްކާތެރި ޖީލެއް ބިނާކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، މީގެ ކުރިން ދުނިޔޭގެ ޞިއްޙަތު ޖަމްޢިއްޔާއާއި ޔުނިސެފްއާ އެކުވެސް ޞިއްޙީ ވުޒާރާއިން ވަނީ މަޝްވަރާ ބައްދަލުވުންތަކެއް ބާއްވާފައެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ސިޔާސަތެއްގެ ގޮތުގައި ފާހަގަކުރެވޭ ކަމެކެވެ.
ރައީސުލްޖުމްހޫރިއްޔާ ވިދާޅުވެފައިވަނީ “ޖީލުތަކެއް މި ވަބާގެ ތެރެއަށް ގެއްލިގެންދާ މަންޒަރު ބަލަން ސަރުކާރަކުން ތިބެންވާނެ ކަމަކަށް ގަބޫލެއް ނުކުރަން. ދުންފަތުގެ އިސްތިޢުމާލުކުރުން އާދައަކަށް ނުވަނީސް އެކަން ހުއްޓުވަންޖެހޭ” ކަމަށެވެ.
މި ސިޔާސަތުގެ ދަށުން، 2000 ވަނަ އަހަރުން ފެށިގެން އުފަންވެފައިވާ އަދި އުފަންވާ ކުދިންނަށް ދުންފަތުގެ އިސްތިޢުމާލުކުރުން މަނާކުރުމަށް ގިނަ ރައްޔިތުން ތާއީދުކުރާކަން، ރައީސުލްޖުމްހޫރިއްޔާ ކުރިއަށް ގެންދެވި “ރައްޔިތުންނާ އެކު” ޕޮޑްކާސްޓާ ގުޅިގެން ބޭއްވި ޚިޔާލު ހޯދުމުގެ ޕޯލުން ވަނީ ފާހަގަކުރެވިފައެވެ.
އަދި ރައީސުލްޖުމްހޫރިއްޔާ ވަނީ ދުންފަތުގެ އިސްތިޢުމާލުކުރާ އެހެނިހެން އުމުރުފުރާތަކުގެ މީހުންނަށާއި، ރާއްޖެއަށް ދުންފަތުގެ ބާވަތްތައް އެތެރެކޮށް ވިޔަފާރިކުރާ ފަރާތްތަކަށް އެ އާދަ ދޫކޮށްލުމަށާއި، ވިޔަފާރި ހުއްޓާލުމަށް އިލްތިމާސްކުރައްވާފައެވެ.
