ހ. ހުޅުގަލި ގޭގައި ސިނގިރޭޓު އުފައްދާ ކަމުގެ މައުލޫމާތު ލިބިގެން ފުލުހުން އަތުލައިގަތް ސިނގިރޭޓުތައް، އެ ތަކެތި އުފެއްދި ކުންފުނި ކަމަށްވާ ރޭޑިއަސް ޕްރައިވެޓް ލިމިޓެޑާ ހަވާލުކުރުމަށް ކްރިމިނަލް ކޯޓުން އަމުރުކޮށްފިއެވެ.
ފުލުހުން މި މައްސަލައިގައި އެޕާޓްމަންޓަށް ވަދެ ބަލައި ފާސްކުރީ މިދިޔަ ޖެނުއަރީ 30 ވަނަ ދުވަހުގެ ރޭގައެވެ. އެ އޮޕަރޭޝަނުގައި ދުންފަތް ހިމެނޭ ގޮތަށް ޖުމްލަ 103 ކާޑުބޯޑު ފޮށިގަނޑު ފުލުހުން ވަނީ އަތުލައިގަނެފައެވެ.
ރޭޑިއަސް ޕްރައިވެޓް ލިމިޓެޑުން ކްރިމިނަލް ކޯޓުގައި އެދިފައިވަނީ އެ ކުންފުނިން އުފައްދާފައިވާ ސިނގިރޭޓާއި އެތެރެކޮށްފައިވާ ދުންފަތުގެ އިތުރުން ސިނގިރެޓު ޕެކުކުރަން ރާވާފައިވާ ހުސް ފޮށިތައް ދޫކޮށްދިނުމުގެ އަމުރެއް ނެރެދިނުމަށެވެ. ކުންފުނިން ބުނެފައިވަނީ އަތުލައިގަނެފައިވާ ތަކެއްޗަކީ ދުންފަތުގެ ބާވަތްތައް ރާއްޖޭގައި އުފެއްދުން މަނާކުރި ތާރީޚު ކަމަށްވާ 2023 ވަނަ އަހަރުގެ ނޮވެންބަރު 13 ގެ ކުރިން އުފައްދާފައިވާ ތަކެތި ކަމަށެވެ.
މި މައްސަލައިގައި ކްރިމިނަލް ކޯޓުން ކުރި ހުކުމުގައި ބަޔާންކޮށްފައިވަނީ، ސިނގިރޭޓާއި ދުންފަތް ވިއްކުމަށް ނަގަންޖެހޭ އެންމެހާ ހުއްދަތައް ފުލުހުންނަށް ހުށަހެޅުމުން އެ ތަކެތި ކުންފުންޏާ ހަވާލުކުރުމަށެވެ. އަދި އެ ތަކެތީގެ ފޮރެންސިކް ތަހުލީލުތައް ހެދުމަށް ބޭނުންވާ ސާމްޕަލް ނެގުމަށް އެއްބާރުލުންދީ، ގަވާއިދާ ޚިލާފު އެއްވެސް އަމަލެއް ނުހިންގުމަށް ވެސް ކުންފުންޏަށް އަންގާފައިވެއެވެ.
ދުންފަތް ކޮންޓްރޯލް ކުރުމާބެހޭ ގާނޫނުގެ ދަށުން މިހާރު ރާއްޖޭގައި ދުންފަތުގެ އުފެއްދުންތައް އުފެއްދުން މަނާ ކަމަށްވީ ނަމަވެސް، ދުންފަތުގެ ބައެއް ބާވަތްތައް ރާއްޖެއަށް އެތެރެކުރުމުގެ ހުއްދަ އޮވެއެވެ.
