ރާއްޖޭގެ ޤައުމީ އެއަރލައިން މޯލްޑިވިއަނުން ރަށު ފަތުރުވެރިކަން އިތުރަށް ފުޅާކުރުމަށްޓަކައި ޚާއްސަ ފެއަރތަކެއް ތަޢާރަފްކޮށްފިއެވެ. މި ފެއަރތަކުގެ ދަށުން ފްރީ އިންޑިޕެންޑެންޓް ޓްރެވެލަރުންނަށް އެވްރެޖްކޮށް 15 އިންސައްތައިގެ ޑިސްކައުންޓެއް ލިބިގެންދާނެއެވެ.
އައިލެންޑް އޭވިއޭޝަނުން ނެރުއްވި ބަޔާނެއްގައި ވިދާޅުވެފައިވަނީ މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދާ އެއްގޮތަށް ރަށު ފަތުރުވެރިކަން ކުރިއެރުވުމަށް އަޅުއްވާ މުހިންމު ފިޔަވަޅެއް ކަމަށެވެ. މި ފިޔަވަޅުގެ ސަބަބުން ޓުއަރ އޮޕަރޭޓަރުންނާއި ޓްރެވަލް އެޖެންސީތަކުގެ އެހީތެރިކަމަކާ ނުލައި ރަށު ފަތުރުވެރިކަން ތަޖުރިބާކުރަން ބޭނުންވާ ފަތުރުވެރިންނަށް ފަސޭހަވެގެންދާނެ ކަމަށް ބަޔާނުގައި ފާހަގަކޮށްފައިވެއެވެ.
މޯލްޑިވިއަނަކީ ރާއްޖޭގައި އެންމެ ގިނަ ޑޮމެސްޓިކް ދަތުރުތައް ކުރާ އެއަރލައިންއެވެ. މިވަގުތު މޯލްޑިވިއަންގެ ބޯޓުތައް ރާއްޖޭގެ 17 ސަރަހައްދަކަށް ދަތުރުކުރަމުންދެއެވެ. މި ފެއަރތަކާއެކު ރަށު ފަތުރުވެރިކަމަށް އަންނަ ފަތުރުވެރިންގެ އަދަދު އިތުރުވެގެންދާނެ ކަމަށް އައިލެންޑް އޭވިއޭޝަނުން އުންމީދުކުރައްވައެވެ.
ސަރުކާރުން ރަށު ފަތުރުވެރިކަމަށް ޚާއްސަ އިސްކަމެއް ދެއްވަމުންދާއިރު، މި ދާއިރާއިން ލިބޭ އާމްދަނީގެ ބައެއް ކައުންސިލްތަކާ ހިއްސާކުރުމުގެ މަސައްކަތްވެސް ކުރިއަށްދެއެވެ. އެގޮތުން ރަށު ފަތުރުވެރިކަމުން ނަގާ ޓެކުހުގެ 10 އިންސައްތަ ކައުންސިލްތަކަށް ދިނުމާ ގުޅޭގޮތުން މަޝްވަރާތައް މިހާރު ވަނީ ފެށިފައެވެ. މިއީ ރަށްރަށުގެ ތަރައްޤީއަށް ކައުންސިލްތަކަށް އިތުރު ފުރުސަތުތަކެއް ހޯދައިދިނުމަށް އެޅޭ މުހިންމު ފިޔަވަޅެއް ކަމަށް ސަރުކާރުން ފާހަގަކުރައްވައެވެ.
