ރައީސުލްޖުމުހޫރިއްޔާ ޑރ. މުހައްމަދު މުއިއްޒާއި، ފީފާގެ ރައީސް ޖިއާނީ އިންފަންޓީނޯ އާއިއެކު ހާއްސަ ފުޓްބޯޅަ މެޗެއްގައި ބައިވެރިވެ ވަޑައިގަންނަވާގޮތަށް ހަމަޖެހިފައިވާކަމަށް އެފްއޭއެމްއިން ބުނެފިއެވެ.
ރައީސް މުއިއްޒާއި ފީފާގެ ރައީސް އިންފަންޓީނޯ ބައިވެރިވެ ވަޑައިގަންނަވާ މި ހާއްސަ ފުޓްބޯޅަ މެޗް އޮންނާނީ މާދަމާ ހަވީރު 4:00 އިން 6:00 އަށް ގަލޮޅު ދަނޑުގައެވެ.
ފީފާގެ ރައީސްގެ މި ދަތުރުފުޅުގެ ތެރެއިން މާދަމާ ހަވީރު ގަލޮޅު ރަސްމީ ދަނޑުގައި ޚައްސަ ހަރަކާތްތަކެއް ކުރިޔަށް ގެންދިޔުމަށް ހަމަޖެހިފައިވެއެވެ. އެގޮތުން ރައީސް މުޢިއްޒު އަދި އިންފަންޓީނޯ ބައިވެރިވެވަޑައިގަންނަވާ ޚާއްސަ މެޗުގެ އިތުރުން ރާއްޖެގެ ފުޓްބޯޅަ އެކަޑަމީތަކާއި، ޒުވާން ކުޅުންތެރިންގެ ހުނަރު ދައްކާލުމުގެ މެޗުތަކެއް ވެސް މާދަމާ އޮންނާނެއެވެ.
ރާއްޖެއަށް ފީފާގެ ރައީސަކު 2006 ވަނަ އަހަރުގެ ފަހުން ކުރާ ފުރަތަމަ ރަސްމީ ދަތުރުގައި، ރާއްޖޭގެ ފުޓުބޯޅައިގެ ހާލަތާއި ފުޓުބޯޅައިގެ ކުރިއެރުމާ ގުޅޭގޮތުން ރައީސް މުއިއްޒު، އިންފަންޓީނޯއާ މަޝްވަރާ ކުރައްވާނެ ކަމަށް ވެސް އެފްއޭއެމްއިން ހާމަކޮށްފައިވެއެވެ.
