ދުންފަތުގެ އިސްތިއުމާލުކުރުމުން ރައްކާތެރި ޖީލެއް ބިނާކުރުމުގެ ސިޔާސަތު ކަމުގައިވާ “ޖެނެރޭޝަނަލް ބޭން އޮން ޓޮބޭކޯ” ތަންފީޒުކުރަން ފެށުން ފާހަގަކުރުމުގެ ގޮތުން، ތަޢުލީމީ ވުޒާރާއިން އިސްނަގައިގެން ހުޅުމާލޭގައި ޚާއްސަ ކުޑަކުދިންގެ ހަވީރެއް ބާއްވައިފިއެވެ. މިއަދުން ފެށިގެން ރާއްޖޭގައި ތަންފީޒުކުރަން ފެށި މި ސިޔާސަތާ ގުޅުވައިގެން ކުރިއަށްގެންދިޔަ މި ހަވީރު ބޭއްވީ ހުޅުމާލެ ސެންޓްރަލް ޕާކުގައެވެ.
ތަޢުލީމީ ވުޒާރާއިން އިސްނަގައިގެން ބޭއްވި މި ހަވީރު ކުރިއަށް ގެންގޮސްފައިވަނީ ހުޅުމާލޭ ސްކޫލްތަކާއި ސީއެޗްސީ ގުޅިގެންނެވެ. މީގެ މައިގަނޑު މަޤްސަދަކީ ދުންފަތުގެ އިސްތިއުމާލުކުރުމާ ދެކޮޅަށް އާންމުން ހޭލުންތެރިކުރުމާއި، ޚާއްސަކޮށް ކުޑަކުދިންނަށް މިކަމުގެ ނުރައްކާތައް އަންގައިދިނުމުގެ އިތުރުން ދުޅަހެޔޮ ޖީލެއް ބިނާކުރުމުގެ އަޒުމް އާކުރުމެވެ.
ހަވީރުގައި އެކި އުމުރުފުރާގެ ކުދިންނަށް ޚާއްސަކޮށްގެން ތަފާތު ސްޓޯލްތައް ބަހައްޓާފައިވެއެވެ. މި ސްޓޯލްތަކުގެ ތެރޭގައި “ޖެނެރޭޝަނަލް ބޭން” އާއި ދުންފަތުގެ އިސްތިއުމާލު ކުރުމާބެހޭ މައުލޫމާތު ދިނުމުގެ ސްޓޯލްތަކުގެ އިތުރުން، ކުޅިވަރުތަކާއި ކާބޯތަކެތީގެ ސްޓޯލްތައްވެސް ހިމެނެއެވެ. މިއީ މަޖާ މާހައުލެއްގައި މުހިންމު ސިއްހީ މައުލޫމާތުތައް ކުދިންނަށް ފޯރުކޮށްދިނުމަށް އެޅުނު މުހިންމު ފިޔަވަޅެކެވެ.
މި ހަވީރާ ގުޅޭގޮތުން ވާހަކަފުޅު ދައްކަވަމުން ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވީ، މިއީ “ޖެނެރޭޝަނަލް ބޭން” ތަންފީޒުކުރުމާ ގުޅިގެން އާންމުން ހޭލުންތެރިކުރުމަށް ކުރިއަށް ގެންދިޔަ ހަވީރެއް ކަމަށެވެ. ވަޒީރު ފާހަގަކުރެއްވި ގޮތުގައި، “ޒުވާނުންނާއި ހެދިބޮޑުވަމުން އަންނަ ކުދިން ދުންފަތުން ސަލާމަތްކުރުމަށް ދުޅަހެޔޮ ޖީލެއް ބިނާކުރުމުގެ ވަރަށް ބޮޑު އަޒުމެއް މިކަމުގެ ސަބަބުން އާކުރެވިގެން ދިޔައެވެ. އަދި މިފަދަ ކަމެއް ކާމިޔާބު ކުރެވޭނީ އެންމެން ގުޅިގެން ކަމަށްވެސް” ވަޒީރު ވަނީ އިޝާރާތްކުރައްވާފައެވެ.
“ޖެނެރޭޝަނަލް ބޭން އޮން ޓޮބޭކޯ” އާއި ގުޅުވައިގެން ސަރުކާރުން ނިންމެވި ނިންމެވުމަކީ މުހިންމު ނިންމެވުމެއް ކަން ބައިވެރިވި އެކި އުމުރުފުރާތަކުގެ މީހުން ވަނީ ފާހަގަކޮށްފައެވެ. ޕީއެސްއެމް ނިއުސްއާ ވާހަކަ ދައްކަމުން އެމީހުން ބުނީ، މިކަމުގެ ސަބަބުން ކުރިއަށް އޮތް ޖީލުތަކަށް ވަރަށް ބޮޑު ހެޔޮބަދަލެއް އަންނާނެ ކަމަށް ގަބޫލުކުރެވޭ ކަމަށެވެ. ތަޢުލީމީ ވުޒާރާއިން އިސްނަގައިގެން ބޭއްވި މި ހަވީރަށް އާންމުންގެ ބޮޑު ތަރުހީބެއް ލިބިފައިވާއިރު، ސަރުކާރުގެ މި ނިންމެވުމަށް ގިނަ ބަޔަކު ދަނީ ތަޢުރީފު ކުރަމުންނެވެ.
