ޅައުމުރުފުރާގެ ކުދިންގެ ދިވެހި ބަހުގެ ފެންވަރު ރަނގަޅުކުރުމަށް އެކަށީގެން ގޮތެއްގައި މީގެ ކުރިން މަސައްކަތް ކުރެވިފައި ނުވާކަމަށް ތައުލީމީ ވަޒީރު ޑރ. އިސްމާއިލް ޝަފީއު ވިދާޅުވެއްޖެއެވެ. ވަޒީރު މިކަން ފާހަގަކުރެއްވީ، ތުއްތު ކުދިންގެ ދިވެހި ބަހުގެ ހުނަރު ތަރައްޤީކުރުމަށް ފެށި ނެޝަނަލް އަރލީ ލާރނިން ޕްރޮގްރާމް ފެށުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުންނެވެ.
ޑރ. އިސްމާއިލް ޝަފީއު ވިދާޅުވީ، މުޖްތަމައުގެ އަބަދުވެސް ދެކޭ އެއް ވާހަކައަކީ ތުއްތު ކުދިންގެ ދިވެހިބަހުން ވާހަކަދެއްކުމުގެ އަދި ކިޔުމުގެ ހުނަރު ދަށްވަމުންދާ ވާހަކަކަމަށެވެ. ނަމަވެސް ހިތާމަޔަކީ، ތުއްތު ކުދިންގެ ދިވެހި ބަހުގެ ފެންވަރު މަތިކުރުމަށް އެކަށީގެންވާ ގޮތެއްގައި އިންވެސްޓުކޮށްފައިވާލެއް މަދުވުންކަމަށް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، މާކެޓުގައި ތުއްތު ކުދިންނަށް ބޭނުންވާ ފޮތާއި، ބަލާލުމަށް ޚާއްސަ ފިލްމުތަކާއި، އަޑު އަހާލަން ރަނގަޅު އޯޑިއޯ ފޮތްތައް ލިބޭން ނެތްކަމަށެވެ. އެހެންކަމުން، ތުއްތު ކުދިންގެ ދިވެހި ބަހުގެ ފެންވަރު މަތިކުރެވޭނީ އެކުދިންނަށް ބޭނުންވާ ދިވެހި އުނގަންނައިދިނުމުގެ ވަސީލަތްތައް ތަރައްޤީކޮށްގެންކަމަށާއި، ލޭންގުއޭޖް ޑިވްލޮޕްމަންޓުގެ އެކި ފޭސްތަކަށް ބަލާއިރުގައި އެންމެ މުހިންމު އެއް އުމުރުފުރާއަކީ ޕްރައިމަރީ އުމުރުފުރާކަމަށް ވަޒީރު ވިދާޅުވިއެވެ.
ޑރ. އިސްމާއިލް ޝަފީއު ވިދާޅުވީ، “ވިސްނުމުގެ އެންމެ މުހިންމު އަސާސަކީ ކިޔުމުގެ އާދަ ކުދިންގެ ކިބައިގައި އަށަގެންނެވުން. މިއާދަ ކުދިންގެ ކިބައިގައި އަށަގެންނެވޭނީ އެކުދިން ބަލާ ހިއްވާފަދަ ކިޔާހިއްވާފަދަ އެވާހަކައިން އެ ލިޔުމެއް ކިޔުމުން އެކުދިން އެކަމަށް ޝައުގުވެރިވާފަދަ ކްރިއޭޓިވް ލިޔުންތަކެއް އަޅުގަނޑުމެންނަށް ދިވެހި ބަހުން ނެރެދީގެން” ކަމަށެވެ. މި މަސައްކަތުގައި ރާއްޖޭގައި ހުނަރުވެރި ބޭފުޅުން ތިބިކަމަށާއި، އެހެންކަމުން މި ވުޒާރާއާ ގުޅިގެން ރަނގަޅު ކޮންޓެންޓު އުފެއްދުމަށް މަސައްކަތްކުރުމަކީ މުހިންމު ކަމެއްކަމަށް ވަޒީރު ވިދާޅުވިއެވެ. އަދި މި ދާއިރާއަކީ ދިވެހި ކުންފުނިތަކުންވެސް އިންވެސްޓުކުރުން މުހިންމު ދާއިރާއެއްކަމަށް އޭނާ ފާހަގަކުރެއްވިއެވެ.
މި ޕްރޮގްރާމް ފެށުމާއެކު، ތައުލީމީ ވުޒާރާގެ ކޯޕަރޭޓިވް ސޯޝަލް ރެސްޕޮންސިބިލިޓީ (ސީ.އެސް.އާރު) ޕްރޮގްރާމެއްގެ ދަށުން، ބޯއިންގްގެ އެހީތެރިކަމާއެކު ރޫމްޓުރީޑްއިން، ނޭޝަނަލް އިންސްޓިޓިއުޓް އޮފް އެޑިޔުކޭޝަން (އެން.އައި.އީ) އާ ގުޅިގެން ވަނީ މަސައްކަތް ފަށާފައެވެ. މި މަސައްކަތުގެ ދަށުން، ދިވެހި ބަހުން ކިޔެވުމާއި ޕްރައިމަރީ ތައުލީމު ހަރުދަނާކުރުމަށްޓަކައި، ދިވެހި ބަހަށް ފައްތާފައިވާ ކުޑަކުދިންގެ ފޮތްތަކެއް ވަނީ ޕްރިންޓްކޮށް، ޑިޖިޓައިޒްކޮށް، ގައުމީ ފެންވަރުގައި ހުރިހާ ޕްރައިމަރީ ސްކޫލްތަކަށް ބަހާފައެވެ. މިހާތަނަށް ދިވެހި ބަހުން ލިޔެފައިވާ 15 ފޮތެއް ވަނީ ލޯންޗުކޮށްފައެވެ.
