މާލޭގެ ގެއަކުން ގިނަ އަދަދެއްގެ ކެނެބިސް ފެނުނު މައްސަލައެއްގައި، އައްޑޫ ސިޓީ ހިތަދޫއަށް ނިސްބަތްވާ މުހައްމަދު ސުއައިދު އަހުމަދު 25 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފިއެވެ.
މި މައްސަލައަކީ 2023 ސެޕްޓެމްބަރު މަހު ފުލުހުން ހިންގި އޮޕަރޭޝަނެއްގައި، އޭނާ ދިރިއުޅުނު ހ. ލުމެން ގޭގެ އެޕާޓްމެންޓަކުން 84.9128 ގްރާމް ކެނެބިސް އާއި މަސްތުވާތަކެތި ބަންދުކުރަން ބޭނުންކުރާ ސާމާނު ފެނުނު މައްސަލައެކެވެ.
މި މައްސަލައިގައި ސުއައިދުގެ މައްޗަށް ދެ ދައުވާއެއް އުފުލާފައިވެއެވެ. އެއީ ކެނެބިސް ޓްރެފިކް ކުރުމުގެ ދައުވާއާއި، ޖަދުވަލު 1 ގައިވާ މަސްތުވާއެއްޗެއް ޓްރެފިކް ކުރުމުގެ ދައުވާއެވެ. ޝަރީއަތުގެ ކުރީކޮޅު ދައުވާތަކަށް އިންކާރު ކުރި ނަމަވެސް، ފަހުން އޭނާ ވަނީ ދައުލަތާއެކު އިއުތިރާފުގެ އެއްބަސްވުމެއް ގާއިމުކޮށްފައެވެ.
ގާޒީ ކުރެއްވި ހުކުމުގައި، ކެނެބިސް ޓްރެފިކް ކުރުމުގެ ދައުވާއަށް ކަނޑައެޅި 12 އަހަރާއި 6 މަހުގެ ހުކުމުން، އޭނާ ބަންދުގައި ހޭދަކުރި މުއްދަތު އުނިކުރުމަށްފަހު ތަންފީޒު ކުރަންޖެހޭނީ 10 އަހަރާއި 1 މަހާއި 20 ދުވަހުގެ ޖަލު ހުކުމެއް ކަމަށް ކަނޑައެޅުއްވިއެވެ. އަދި ދެވަނަ ދައުވާއާ ގުޅިގެން 12 އަހަރާއި 6 މަހުގެ ޖަލު ހުކުމެއް އިއްވިއެވެ. މީގެ އިތުރުން ދެ ދައުވާއާ ގުޅިގެން ޖުމްލަ 100،000 ރުފިޔާއިން އޭނާ ވަނީ ޖޫރިމަނާކޮށްފައެވެ.
