ބަލިމީހަކަށް ދީފައިވާ އެހީގެ ތަފްސީލް އާންމުވުން ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އިން މާފަށް އެދިއްޖެއެވެ.
އެންސްޕާއިން މާފަށް އެދިފައިވަނީ މި މައްސަލައިގައި ގިނަ ބައެއްގެ ފާޑިކިޔުން އަމާޒުވަމުން އަންނަ ދަޑިވަޅެއްގައެވެ.
އެންސްޕާއިން ނެރުނު ބަޔާނެއްގައި ބުނީ ބަލި މީހާގެ އެއްވެސް އައިޑެންޓިޓީއެއް ހިމަނާފައި ނުވި ނަމަވެސް އެ ބަޔާނުގައި ބަލި މީހާއަށް އެ އެޖެންސީން ދީފައިވާ އެހީގެ މައުލޫމާތު ހިމެނިފައިވާތީ އެއީ އެންމެ ރަނގަޅު ގޮތް ވެސް ނޫންކަމަށެވެ.
އަދި މިފަދަކަންތައްތަކަކީ ރާއްޖޭގެ ރައްޔިތުން އިޖްތިމާއީ ރައްކާތެރިކަމަށާއި، ރައްޔިތުންނަށް މާލީ އެހީތެރިކަން ފޯރުކޮށްދިނުމަށް ހިންގަމުންދާ އެޖެންސީއެއް ކަމަށްވާއިރު ކަންބޮޑުވާ ކަމެއްކަމަށްވެސް މެއެވެ. އަދި އެ އެޖެންސީން ބަލި މީހަކަށް އެހީނުދިންކަމަށް ބުނެ ސޯޝަލް މީޑިއާގައި ދޮގު މައުލޫމާތު ފަތުރާ އެ އެޖެންސީ ބަދުނާމުވުމަކީ ވެސް ނުހަނު ކަންބޮޑުވާ ކަމެއް ކަމަށެވެ.
