ދިވެހިރާއްޖޭގައި މޯބައިލް ސިމްކާޑު ދޫކުރުމުގައި މިހާރު އަމަލުކުރަމުންދާ އުސޫލުތައް އިތުރަށް ހަރުދަނާކުރުމަށާއި، ޖަލުތަކުގެ ސަލާމަތީ ކަންކަން ވަރުގަދަކުރުމަށް ވަޒީރުންގެ މަޖިލީހުން މުހިއްމު ނިންމެވުންތަކެއް ނިންމަވައިފިއެވެ. ރައީސުލްޖުމްހޫރިއްޔާގެ އޮފީހުން ހާމަކުރެއްވި ގޮތުގައި މި ނިންމެވުންތައް ނިންމަވާފައިވަނީ އޮގަސްޓް 2024 ގައި ބޭއްވެވި ވަޒީރުންގެ މަޖިލީހުގެ ޖަލްސާގައެވެ.

މި ނިންމެވުންތަކުގެ ތެރެއިން އެންމެ ފާހަގަކޮށްލެވޭ އެއް ކަމަކީ، ރާއްޖޭގައި މަސައްކަތްކުރާ އަންސްކިލްޑް ނުވަތަ ހުނަރުވެރިކަމެއް ނެތް ކޮންމެ ބިދޭސީއަކަށް ދޫކުރެވޭނީ ގިނަވެގެން އެންމެ ސިމްކާޑެއް ކަމަށް ހަމަޖެއްސެވުމެވެ. މީގެ އިތުރުން، ސިމްކާޑެއް ހަލާކުވެގެން ނުވަތަ ގެއްލިގެން އާ ސިމްކާޑެއް ހޯދަން ބޭނުންވާ ހާލަތްތަކުގައި، މޯލްޑިވްސް ޕޮލިސް ސަރވިސްއަށް ރިޕޯޓްކޮށް، ކަނޑައެޅޭ ވަކި ޚާއްޞަ އިޖުރާއަތްތަކެއްގެ ތެރެއިން މެނުވީ އާ ނަންބަރެއް ދޫނުކުރާ ގޮތަށް ވަނީ ނިންމަވާފައެވެ. ސަރުކާރުގެ މި ނިންމެވުމުގެ މައިގަނޑު މަޤްޞަދަކީ ސިމްކާޑުތައް ބޭނުންކޮށްގެން ހިންގާ ކުށްތަކާއި، ފޯނު މެދުވެރިކޮށް ހިންގާ ސްކޭމްތައް ހުއްޓުވުމެވެ.

ޖަލުތަކުގެ ތެރޭގައި ޣައިރުޤާނޫނީ ގޮތެއްގައި މުއާސަލާތީ ވަސީލަތްތައް ބޭނުންކުރުން ހުއްޓުވުމަށްޓަކައި، ޖަލުތަކަށް ވަގަށް ވައްދާ ސިމްކާޑުތައް ރަޖިސްޓަރީކޮށްފައިވާ ފަރާތްތަކާ މެދު ޤާނޫނީ އަދި އިދާރީ ފިޔަވަޅުތައް އެޅޭނެކަން ކަށަވަރުކުރުމަށްވެސް ވަޒީރުންގެ މަޖިލީހުން ވަނީ ނިންމަވާފައެވެ. މި ފިޔަވަޅުގެ ސަބަބުން ސިމްކާޑުތަކުގެ ވެރިފަރާތްތައް މިހާރަށްވުރެ ބޮޑަށް ޖަވާބުދާރީ ކުރުވޭނެ ކަމަށް ސަރުކާރުން ދެކެއެވެ.

ވަޒީރުންގެ މަޖިލީހުގެ މި ޖަލްސާގައި، އެކި މައްސަލަތަކުގެ ތަޙުޤީޤަށް ހައްޔަރުކޮށް، ޙުކުމެއް ނެތި ބަންދުގައި ތިބޭ މީހުންގެ އަދަދު ދުނިޔޭގެ ނިސްބަތުން އެންމެ މަދު ޤައުމަކަށް ރާއްޖެ ހެދުމަށްވެސް ވަނީ އަމާޒު ހިފާފައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރަކީ ޖަލުގައި ތިބޭ މީހުންނަކީ މުޖުތަމަޢަށް ބޭނުންތެރި ބަޔަކަށް ހެދުމެވެ. އެގޮތުން ޖަލުގައި ތިބެގެން މަސައްކަތްކުރާ ކުށްވެރިންނަށް އާމްދަނީ ހޯދޭނެ މަގު ފަހިކޮށްދިނުމާއި، މަސައްކަތްކުރާ ކޮންމެ ދުވަހަކަށް ޙުކުމުން ދުވަހެއް އުނިކޮށްދިނުމުގެ ސިޔާސަތެއް އެކުލަވާލުމުގެ މަސައްކަތް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ދަނީ ކުރަމުންނެވެ.

މި ނިންމެވުންތައް ތަންފީޒުކުރުމުގައި ކޮމިއުނިކޭޝަންސް އޮތޯރިޓީ އޮފް މޯލްޑިވްސް (ސީ.އޭ.އެމް) އާއި ކަމާބެހޭ އެހެނިހެން މުއައްސަސާތަކުން ގުޅިގެން މަސައްކަތް ކުރާނެ ކަމަށް ރައީސް އޮފީހުން ބުނެފައިވެއެވެ.