އިންސާނީ އެހީ ފޯރުކޮށްދޭ ފަރާތްތަކަށް އަމާޒުކޮށް ދޭ ހަމަލާތައް ހަރުކަށި އިބާރާތުން ކުށްވެރިކުރަން: ރައީސް

އިންސާނީ އެހީ ފޯރުކޮށްދިނުމުގައި ހަރަކާތްތެރިވާ ފަރާތްތަކަށް އަމާޒުކޮށް ހިންގާ އަނިޔާވެރި އަމަލުތައް ދިވެހިރާއްޖެއިން ހަރުކަށި އިބާރާތުން ކުށްވެރިކުރާކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ދުނިޔޭގެ އިންސާނީ އެހީތެރިކަމުގެ ދުވަހުގެ މުނާސަބަތުގައި ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައެވެ.

ދުވަހާ ގުޅިގެން ރައީސުލްޖުމްހޫރިއްޔާ ކުރެއްވި ޕޯސްޓްގައި ވިދާޅުވީ، ދުނިޔޭގެ އިންސާނީ އެހީތެރިކަމުގެ ދުވަހުގެ މުނާސަބަތުގައި، އިންސާނިއްޔަތަށްޓަކައި އަމިއްލަ ފުރާނަ އަތްމައްޗަށްލައިގެން ދުނިޔޭގެ އެކި ކަންކޮޅުތަކުގައި މަސައްކަތްކުރަމުންދާ އިންސާނީ ޚިދުމަތްތެރިންނާއެކު ދިވެހިރާއްޖެ ސާބިތުކަމާއެކު ދެމިއޮންނާނެ ކަމަށެވެ.

ރައީސްގެ މެސެޖްގައި އިތުރަށް ފާހަގަކުރެއްވި ގޮތުގައި، އިންސާނީ އެހީތެރިކަމަށް ބޭނުންވެފައިވާ މިންވަރު އިތުރުވަމުންދާ މި ދަނޑިވަޅުގައި، އާންމު ރައްޔިތުންނާއި އެހީދޭ ފަރާތްތައް ހިމާޔަތްކުރުމުގައި ދުނިޔެ ނުކުޅެދިފައިވާކަން އެންމެ ބޮޑަށް ފެންނަމުންދަނީ ޣައްޒާއިންނެވެ. އެހެންކަމުން އިންސާނީ އެހީ ފޯރުކޮށްދިނުމަށް ހުރަސްއެޅުމާއި، އެހީދޭ މުވައްޒަފުންނަށް އަމާޒުކޮށް ހިންގާ އަނިޔާވެރި އަމަލުތައް ކުށްވެރިކުރައްވައި، މިހާރުން މިހާރަށް ދާއިމީ ގޮތެއްގައި ހަމަލާތައް ހުއްޓާލުމަށް ކުރާ ގޮވާލުން އެމަނިކުފާނު ވަނީ ތަކުރާރުކުރައްވާފައެވެ.

މީގެ އިތުރުން، އިންސާނީ ޚިދުމަތުގައި ދެމިތިބި ފަރާތްތަކާއި، އެހެން މީހުންގެ ފުރާނަ ސަލާމަތްކުރުމަށްޓަކައި އަމިއްލަ ފުރާނައިން ގުރުބާންވި ފަރާތްތަކުގެ އަގުވަޒަންކުރައްވައި އެފަރާތްތަކަށް ރައީސް ވަނީ އިހުތިރާމް އަދާކުރައްވާފައެވެ. އަދި އެފަރާތްތަކުން ދައްކުވައިދިން ހިތްވަރަކީ، ބައިނަލްއަގުވާމީ އިންސާނީ ގާނޫނުތައް ނެގެހެއްޓުމަށާއި، ހުރިހާ އިންސާނީ ޚިދުމަތްތެރިންގެ ރައްކާތެރިކަން ކަށަވަރުކުރުމަށް އެންމެން ގުޅިގެން މަސައްކަތްކުރުމަށް ލިބޭ ބާރެއް ކަމުގައިވެސް ވިދާޅުވިއެވެ.

ކޮންމެ އަހަރެއްގެ އޮގަސްޓް މަހުގެ 19 ވަނަ ދުވަސް ދުނިޔޭގެ އިންސާނީ އެހީތެރިކަމުގެ ދުވަހުގެ ގޮތުގައި ފާހަގަކުރަނީ އިންސާނީ ޚިދުމަތުގައި ދެމިތިއްބާ މަރުވި ނުވަތަ އަނިޔާވި ފަރާތްތަކުގެ ޒިކުރާ އާކުރުމަށެވެ. އަދި އިންސާނީ އެހީތެރިކަމަށް ބޭނުންވެފައިވާ ކަންކަމަށް ދުނިޔޭގެ ސަމާލުކަން އިތުރުކުރުމާއި، ކާރިސާތަކުގައި އާންމުންނާއި އެހީދޭ މުވައްޒަފުންގެ ރައްކާތެރިކަން ކަށަވަރުކުރުމަށް ވަކާލާތުކުރުމަކީވެސް މި ދުވަސް ފާހަގަކުރުމުގެ މުހިންމު ބޭނުމެކެވެ.