ބާޒާރާއި ފިހާރަތަކުގައި ތަކެތި ހުރި އަގުތައް ބެލޭނެ ގޮތަށް ތައްޔާރުކޮށްފައިވާ "އަގުމަގު" ޕޯޓަލްގައި މިހާތަނަށް 224 ފިހާރައެއް ރަޖިސްޓްރީކޮށްފައިވާ ކަމަށް އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވުޒާރާއިން ވިދާޅުވެއްޖެއެވެ. މި ޕޯޓަލް ރަސްމީކޮށް ލޯންޗުކޮށްފައިވަނީ 28 ފެބުރުވަރީ 2025 ގައެވެ.
އަގުމަގު ޕޯޓަލްގެ މައިގަނޑު ބޭނުމަކީ އަސާސީ ކާބޯތަކެތި ރައްޔިތުންނަށް އަގުހެޔޮކޮށް ފޯރުކޮށްދިނުމާއި، އަސާސީ ކާބޯތަކެތީގެ އަގުތައް އެއްތަނަކުން ފަސޭހަކަމާއެކު ބަލާލެވޭނެ އިންތިޒާމު ހަމަޖެއްސުމެވެ. މި ޕޯޓަލްގައި ހިމަނާފައިވާ ތަކެއްޗަކީ ބައިނަލްއަޤްވާމީ އަދި ރާއްޖޭގެ ކަމާބެހޭ އިދާރާތަކުން އަސާސީ ކާބޯތަކެތި ކަމަށް ކަނޑައަޅާފައިވާ މިންގަނޑުތަކަށް ރިއާޔަތްކޮށް ތައްޔާރުކޮށްފައިވާ ލިސްޓެކެވެ.
ސޯޝަލް މީޑިއާގައި ހިއްސާކުރެއްވި ޕޯސްޓެއްގައި އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ، އަގުމަގު އެޕް މިހާތަނަށް 3،300 އަށްވުރެ ގިނަ މީހުން ޑައުންލޯޑްކޮށްފައިވާ ކަމަށެވެ. އަދި ދުވާލެއްގެ މައްޗަށް އެވްރެޖްކޮށް 2،700 އަށްވުރެ ގިނަ މީހުން މި އެޕްލިކޭޝަން ބޭނުންކުރަމުންދާ ކަމަށްވެސް ވަޒީރު ފާހަގަކުރެއްވިއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.