ސަޢުދީ ޢަރަބިއްޔާގެ މައްކާގައި ހުންނަ މަސްޖިދުލް ޙަރާމުގައި ދުނިޔޭގެ އެންމެ ބޮޑު ފިނިކުރާ ނިޒާމު ކަމަށް ބުނާ ވަރުގަދަ ފިނިކުރާ ނިޒާމެއް މިއަހަރުގެ ޙައްޖު މޫސުމާ ދިމާކޮށް ބޭނުންކުރަން ފަށައިފިއެވެ.
ހޫނު މޫސުމުގައި ސަޢުދީ ޢަރަބިއްޔާގެ ހޫނުމިން 45 ޑިގްރީ ސެލްސިއަސްއަށްވުރެ މަތިވާއިރު، މި އަލަށް ބޭނުންކުރަން ފަށާފައިވާ ނިޒާމަށް 155،000 ޓަނު ފިނިކުރުމުގެ ޤާބިލުކަން ލިބިގެންވެއެވެ.
މިއީ ގަޑިއިރަކު 1.86 ބިލިއަން ބީޓީޔޫ ފިނިކޮށްދޭ މިންވަރެވެ. މި ނިޒާމު މަސައްކަތްކުރަނީ ދެ މައި މަރުކަޒެއްގެ ތެރެއިންނެވެ. އެގޮތުން އަލް-ޝާމިޔާ ސްޓޭޝަނުން 120،000 ޓަނު އަދި އަޖްޔަދު ސްޓޭޝަނުން 35،000 ޓަނު ފިނިކޮށްދެއެވެ.
މި ނިޒާމުގެ ސަބަބުން މިސްކިތުގެ ހުރިހާ ސަރަޙައްދެއްގެ ފިނިހޫނުމިން 22 ޑިގްރީއާއި 24 ޑިގްރީއާ ދެމެދުގައި ހިފެހެއްޓޭނެއެވެ. މީގެ ތެރޭގައި ފަހުގެ އަހަރުތަކުގައި މިސްކިތަށް އިތުރުކުރެވުނު ބައިތައްވެސް ހިމެނެއެވެ.
މި ނިޒާމުގެ އެންމެ ފާހަގަކޮށްލެވޭ އެއް ޚާއްޞަކަމަކީ ވައި ސާފުކުރުމުގެ ޒަމާނީ ޓެކްނޮލޮޖީ ހިމެނިފައިވުމެވެ. މި ނިޒާމުން ވައިގެ ތެރޭގައި ހުންނަ ޖަރާސީމުގެ 95 އިންސައްތަ ނައްތާލެވޭނެއެވެ. މިއީ އެއްފަހަރާ އެތައް ހާސް ބަޔަކު އެއްތަނެއްގައި އުޅޭއިރު ވަރަށް މުހިންމު ކަމެކެވެ.
މިއަހަރުގެ ޙައްޖު މޫސުން ހޫނު މޫސުމުގެ އެންމެ ހޫނު ދުވަސްވަރާ ދިމާވާއިރު، މި ނިޒާމުގެ ސަބަބުން ޚާއްޞަކޮށް ދުވަސްވީ މީހުންނާއި ބަލިމީހުންނަށް ބޮޑެތި ފަސޭހަތަކެއް ލިބިގެންދާނެއެވެ. އަދި މަސްޖިދުލް ޙަރާމުގެ ތަޅުންގަނޑު ވެސް ހަދާފައިވަނީ ހޫނުކަން ކުޑަކޮށްދޭ ގްރީކް ތަސޮސް ބޭނުންކޮށްގެންކަން ފާހަގަކުރެވެއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.