ޢިޖުތިމާޢީ އަދި ޢާއިލީ ވުޒާރާގެ މަސައްކަތްތަކުގެ ތެރެއިން އެންމެ މުހިންމު އެއްކަމަކީ ރައްޔިތުންގެ ހާލު ދެނެގަތުން: ޑރ. އައިޝަތު ޝިހާމް

ޢިޖުތިމާޢީ އަދި ޢާއިލީ ތަރައްޤީއާއި ބެހޭ ވުޒާރާގެ މަސައްކަތްތަކުގެ ތެރެއިން އެންމެ މުހިންމު އެއްކަމަކަށް ކުރާ މަސައްކަތަކީ ރައްޔިތުންގެ ހާލު ދެނެގަތުން ކަމުގައި މިނިސްޓަރ ޑރ. ޢައިޝަތު ޝިހާމު ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވެފައިވަނީ، އެ ވުޒާރާގެ މަސައްކަތްތަކާއި ބެހޭގޮތުން ދައުލަތުގެ މީޑިއާއަށް ދެއްވި ހާއްސަ އިންޓަވިއުއެއްގައެވެ. އެގޮތުން، މުޖުތަމަޢުގައި އުޅޭ ނުކުޅެދުންތެރިކަން ހުންނަ ފަރާތްތަކާއި، އިސްރަށްވެހިންގެ ހާލަތު ދެނެގަތުމަށް ވެސް ރާއްޖޭގެ އެކި ކަންކޮޅުތަކަށް މި ވުޒާރާގެ މުވައްޒަފުން ދަތުރުތައްކުރައްވަމުން ގެންދަވާކަމުގައި ވަޒީރު ވަނީ ފާހަގަކުރައްވާފައެވެ.

މި ދަތުރުތަކުގެ ތެރެއިން، މުޖުތަމަޢު ތެރޭގައި އެހީތެރިކަން ބޭނުންވެފައިވާ ފަރާތްތައް ދެނެގަނެވި އެފަރާތްތަކަށް އެ ބޭނުންވާ އެހީތެރިކަން ފޯރުކޮށްދެވޭނެ ގޮތްތައް އެނގި ކުރިއަށް ދެވޭކަމަށް ވެސް ވަޒީރު ވަނީ ވިދާޅުވެފައެވެ. އަދި މި މަސައްކަތްތަކުގައި ރަށުގެ މުއައްސަސާތަކާއި އަމިއްލަ ޖަމުއިއްޔާތަކުން ދެއްވާ އެއްބާރުލުމާއި އެހީތެރިކަން މިނިސްޓަރ ވަނީ ފާހަގަކުރައްވާފައެވެ.

މީގެ އިތުރުން، ރައްޔިތުންގެ ގާތަށް ޒިޔާރަތްކޮށް ރައްޔިތުންގެ ހާލު ދެނެގަތުމުން، ތަފާތު ދާއިރާތަކުން މުޖުތަމަޢު ބާރުވެރިކުރުމަށް މަސައްކަތްކުރެވޭ ކަމަށް ވެސް ވަޒީރު ވަނީ ފާހަގަކުރައްވާފައެވެ. އެގޮތުން، މި ވުޒާރާއިން ކުރިއަށް ގެންދާ، 'ހާލު ކިހިނެއް' އަދި 'އިބަމަ' ޕްރޮގްރާމްގެ ތެރެއިން ގިނަ ބަޔަކަށް އެހީތެރިކަން ފޯރުކޮށްދެވި މުޖުތަމަޢުގައި އެމީހުންނަކީ ވެސް މުހިންމު ބަޔަކަށް ހެދުމަށް މަސައްކަތް ކުރެވިފައިވާނެކަމަށް މިނިސްޓަރ ވަނީ ވިދާޅުވެފައެވެ.

"ހާލު ކިހިނެއް ޕްރޮގްރާމްގެ ތެރެއިން މީހުންނަށް ޒިޔާރަތް ކުރުމުގެ ތެރޭގައި އެމީހުންނަށް ދިމާވެގެން އުޅޭ ތަފާތު ދަތިތައް ފާހަގަކުރެވި، އޭގެއިން ކުރިއެރުންތަކެއް ލިބޭ" މިނިސްޓަރ ވިދާޅުވިއެވެ.

ހާލު ކިހިނެއް ޕްރޮގްރާމަކީ، އޯގާތެރި މުޖުތަމަޢެއް ބިނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަސައްވުރުގެ މައްޗަށް ރާއްޖޭގެ އާބާދީގައި މީހުން ދިރިއުޅޭ ހުރިހާ ރަށެއްގެ ގޭބިސީތަކަށް ޒިޔާރަތްކޮށް އެ ރައްޔިތުންގެ ހާލު ބަލާ، ދަޢުލަތުގެ ޚާއްސަ އެހީތެރިކަން ބޭނުންވެފައި ނުވަތަ ނާޒުކު ހާލަތްތަކުގައި ދިރިއުޅޭ ފަރާތްތަކަށް އެ ބޭނުންވާ އެހީތެރިކަން ފޯރުކޮށްދިނުމަށްޓަކައި މި ވުޒާރާއިން ފަށައިގެން ކުރިއަށް ގެންދާ ޕްރޮގްރާމެކެވެ. އަދި އިބަމައަކީ ރަށްރަށުގައި އިޖުތިމާޢީ ރައްކާތެރިކަން ފޯރުކޮށްދިނުމުގެ މަސައްކަތް ކަމާ ގުޅުންހުރި މުއައްސަސާތަކާއެކު ވިލަރެސް ކުރެވިފައިވާ ނިޒާމެއްގެ ތެރެއިން ކުރުމަށްޓަކައި އުފައްދާ ގްރޫޕްތަކެކެވެ.