ބޭރު ފައިސާއާ ގުޅޭ އިޞްލާޙުތަކުގެ ސަބަބުން ފިޗް ރޭޓިންގްސްއިން ރާއްޖޭގެ ކްރެޑިޓް ރޭޓިންގ ދަމަހައްޓައިފި

ފިޗް ރޭޓިންގްސް އިން ދިވެހިރާއްޖޭގެ ސޮވްރިން ކްރެޑިޓް ރޭޓިންގ 'ސީސީ' ގައި ދަމަހައްޓައިފިއެވެ.

އެއީ ދިވެހި ސަރުކާރުން ގެނައި މުހިންމު ބޭރު ފައިސާގެ އިޞްލާޙުތަކާ ގުޅިގެން ބޭރު ފައިސާގެ ރިޒަރވް ފާހަގަކޮށްލެވޭ ވަރަށް އިތުރުވެފައިވުމުންނެވެ.

މި އަހަރު އޭޕްރީލް ގައި އޮފިޝަލް ރިޒަރވް އެސެޓްސް 856.3 މިލިއަން އެމެރިކާ ޑޮލަރަށް ވަނީ އަރާފައެވެ. މިއީ ބޭރު ފައިސާގެ ލިކުއިޑިޓީ ވަރުގަދަވެފައިވާކަން ދައްކުވައިދޭ ކަމެކެވެ. މި ކުރިއެރުން އައިސްފައިވަނީ ބޭރު ފައިސާއާ ގުޅޭ ޤާނޫނު ތަންފީޒުކުރުމުގެ ސަބަބުންނެވެ.

މި ޤާނޫނުގެ ދަށުން، ފަތުރުވެރިކަމާ ގުޅުންހުރި ވިޔަފާރިތަކުން ވަކި އަދަދަކަށް ބޭރު ފައިސާގެ އާމްދަނީ ބަދަލުކުރަންޖެހޭއިރު، މީގެ އިތުރުން، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ބޭންކުތަކުން ބަދަލުކުރަންޖެހޭ ބޭރު ފައިސާގެ ނިސްބަތް 60 އިންސައްތައިން 90 އިންސައްތައަށް ވަނީ އިތުރުކޮށްފައެވެ.

ރިޒަރވް ބޭންކް އޮފް އިންޑިއާ އާއި އެމްއެމްއޭ އާ ދެމެދު ޤާއިމުކުރެވިފައިވާ ކަރަންސީ ސްވޮޕް ފެސިލިޓީ ބޭނުންކުރުމަކީވެސް ބޭރު ފައިސާގެ ރިޒާވް ވަރުގަދަކުރުމަށް އެހީތެރިވެފައިވާ ކަމެކެވެ.

މި ފިޔަވަޅުތަކަކީ ރާއްޖޭގެ އިޤްތިސާދު ދެމެހެހެއްޓުމަށާއި ބައިނަލްއަޤްވާމީ އިންވެސްޓަރުންނާއި ބައިވެރިންނަށް ފަހި މާޙައުލެއް އުފެއްދުމަށް ސަރުކާރުން ގެންގުޅޭ އަޒުމާ އެއްގޮތްވާ ކަންކަމެވެ.