ދިވެހިރާއްޖޭގެ ރަށްރަށުގައި ފެނާއި ނަރުދަމާގެ ޚިދުމަތްދޭ ކައުންސިލްތަކާއި އެހެނިހެން އިދާރާތަކަށް އެހީތެރިވުމުގެ ގޮތުން، ފަތުރުވެރިކަމާ ބެހޭ ވުޒާރާއިން ފެނާއި ނަރުދަމާގެ ރައްކާތެރިކަމުގެ އައު ގައިޑްލައިންތަކަކާއި ރިޕޯޓު ފޯމެޓުތަކެއް ތައާރަފުކޮށްފިއެވެ.
މި އިސްނެގުމުގެ މައިގަނޑު މަޤްޞަދަކީ ފެނާއި ނަރުދަމާގެ ނިޒާމުތަކަށް ކުރިމަތިވެދާނެ ނުރައްކާތައް ދެނެގަނެ، އެކަންކަން ހައްލުކުރުމަށް ބޭނުންވާ މަޢުލޫމާތާއި އިރުޝާދު ފޯރުކޮށްދިނުމެވެ. ރާއްޖޭގެ ތިމާވެށީގެ ހާލަތާއި، ގުދުރަތީ ކާރިސާތަކުގެ ސަބަބުން ފެނާއި ނަރުދަމާގެ ނިޒާމުތަކަށް ގެއްލުންވުމުގެ ފުރުސަތު ބޮޑުކަން އެ ވުޒާރާއިން ވަނީ ފާހަގަކޮށްފައެވެ.
“މި ގައިޑްބުކްތަކާއި ރިޕޯޓު ފޯމެޓުތަކުގެ އެހީގައި، ރާއްޖޭގެ ރަށްތަކުގައި ފެނާއި ނަރުދަމާގެ ޚިދުމަތްތައް ދެމެހެއްޓެނިވި ގޮތަކަށް ފޯރުކޮށްދިނުމަށް ވަރަށް ބޮޑު އެހީއަކަށް ވެގެންދާނެ” ކަމަށް އެ މިނިސްޓްރީން ވިދާޅުވިއެވެ.
މި އިސްނެގުމުގެ ދަށުން، ރަށްރަށުގެ ކައުންސިލްތަކަށާއި، ފެނާއި ނަރުދަމާގެ ޚިދުމަތްދޭ ކުންފުނިތަކަށް މި ތަކެތި ފޯރުކޮށްދިނުމުން، އެ ފަރާތްތަކަށް ފަސޭހައިން ނިޒާމުތައް ވަޒަންކޮށް، ދިމާވެދާނެ ގޮންޖެހުންތަކަށް ތައްޔާރުވެ، އެކަންކަން ހައްލުކުރުމަށް މަސައްކަތްކުރެވޭނެއެވެ. މީގެ ސަބަބުން ރައްޔިތުންނަށް ދެމުންގެންދާ ފެނާއި ނަރުދަމާގެ ޚިދުމަތްތައް މެދުނުކެނޑި، ރައްކާތެރިކަމާއެކު ދެމެހެއްޓުމަށް މަގުފަހިވެގެންދާނެއެވެ.
ސާފު ބޯފެނާއި ސާފުތާހިރު ނަރުދަމާގެ ނިޒާމަކީ ކޮންމެ ރައްޔިތެއްގެ އަސާސީ ޙައްޤެއްކަމަށް ފާހަގަކުރައްވައި، މި އައު ގައިޑްބުކްތަކާއި ރިޕޯޓު ފޯމެޓުތަކުގެ ސަބަބުން، ރާއްޖޭގެ ހުރިހާ ކަންކޮޅެއްގައިވެސް ފެނާއި ނަރުދަމާގެ ޚިދުމަތުގެ ފެންވަރު ރަނގަޅުވެ، ރައްޔިތުންނަށް ދިމާވާ ދަތިތައް ކުޑަވެގެންދާނެ ކަމަށް އެ ވުޒާރާއިން ވަނީ ފާހަގަކުރައްވާފައެވެ.
