ކ. ތިލަފުށީގައި މަސައްކަތްކުރާ މުވައްޒަފުންނާއި އެ ރަށުގައި ހަރަކާތްތެރިވާ ވިޔަފާރިތަކަށް ފަސޭހަކޮށްދިނުމުގެ ގޮތުން، ބޭންކް އޮފް މޯލްޑިވްސް (ބީއެމްއެލް) އިން އެ ރަށުގައި އޭޓީއެމްގެ ޚިދުމަތް ރަސްމީކޮށް އިފްތިތާހުކޮށްފިއެވެ.
ތިލަފުށީގައި ބޭއްވި ހާއްސަ ރަސްމިއްޔާތެއްގައި މި ޚިދުމަތް ފަށްޓަވައިދެއްވީ އިކޮނޮމިކް މިނިސްޓަރު މުޙައްމަދު ސަޢީދެވެ.
ތިލަފުށީގައި އަލަށް ހުޅުވި މި އޭޓީއެމް މެދުވެރިކޮށް އަމިއްލަ ފަރުދުންނާއި ވިޔަފާރިތަކަށް 24 ގަޑިއިރު ފައިސާ ނެގުމާއި ޖަމާކުރުމުގެ ޚިދުމަތް ލިބިގެންދާނެއެވެ. މީގެ އިތުރުން، ބިލްތަކަށް ފައިސާ ދެއްކުމާއި އެކައުންޓްތަކުގެ މެދުގައި ފައިސާ ޓްރާންސްފަރ ކުރުމުގެ ފުރުސަތުވެސް މި އޭޓީއެމް މެދުވެރިކޮށް ލިބޭނެއެވެ.
މި ޚިދުމަތް އިފްތިތާހު ކުރުމުގެ ރަސްމިއްޔާތުގައި ބީއެމްއެލްގެ ޗެއާޕަރސަން އަޙްމަދު ޢަލީ ޙަބީބާއި، ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފްގެ އިތުރުން ބޭންކުގެ އިސްވެރިން ބައިވެރިވެވަޑައިގެންނެވިއެވެ. މިއީ ތިލަފުށީގެ ސިނާއީ މާހައުލަށް ގެނެވުނު މުހިންމު ބަދަލެއްގެ ގޮތުގައި ބޭންކުން ފާހަގަކުރެއެވެ.
ރަސްމިއްޔާތުގައި ވާހަކަދައްކަވަމުން މިނިސްޓަރު މުޙައްމަދު ސަޢީދު ވިދާޅުވީ، ރާއްޖޭގެ އެންމެ ބޮޑު އެއް ސިނާޢީ މަސައްކަތްތައް ކުރާ ސަރަހައްދުގައި އޭޓީއެމްގެ ޚިދުމަތް ޤާއިމްކުރެވިގެން ދިއުމަކީ ލިބިގެންދިޔަ ވަރަށް ބޮޑު ކުރިއެރުމެއް ކަމަށެވެ. މިނިސްޓަރު ފާހަގަކުރެއްވި ގޮތުގައި މިއީ އެ ސަރަހައްދުގައި މަސައްކަތްކުރާ ފަރާތްތަކަށް ލިބޭނެ ވަރަށް ބޮޑު ލުޔެކެވެ.
”މި ހިދުމަތާއެކު، ލޮޖިސްޓިކްސްގެ ގޮތުންނާއި އެހެނިހެން ބޭނުންތަކަށް ފައިސާ ނެގުމަށް މާލެއަށް ކުރަންޖެހޭ ދަތުރުތަކަށް ނިމުމެއް އަންނާނެ،“ މިނިސްޓަރު ވިދާޅުވިއެވެ. އަދި މިއީ ތިލަފުށީގައި މަސައްކަތްކުރާ މުވައްޒަފުންނަށާއި ވިޔަފާރިތަކަށް ވަގުތާއި ހަރަދު ސަލާމަތްކުރެވޭނެ މުހިންމު ފިޔަވަޅެއްކަންވެސް މިނިސްޓަރު ފާހަގަކުރެއްވިއެވެ.
ބީއެމްއެލް އިން އަންނަނީ ރާއްޖޭގެ އެކި ކަންކޮޅުތަކުގައި އެ ބޭންކުގެ ޚިދުމަތްތައް ފުޅާކޮށް، ރައްޔިތުންނަށް ފަސޭހަކަމާއެކު ބޭންކިންގ ޚިދުމަތްތައް ފޯރުކޮށްދިނުމަށް ގިނަ މަސައްކަތްތަކެއް ކުރަމުންނެވެ. ތިލަފުށީގައި މި ހުޅުވުނު އޭޓީއެމަކީ އެ މަސައްކަތުގެ ދަށުން އިތުރުކުރެވުނު މުހިންމު ބޮޅެކެވެ.
