ދައުލަތުގެ ވަޒީފާތަކުގައި އުމުރުން 75 އަހަރު ވަންދެން ދެމިހުރެވޭ ގޮތަށް ރީ-އެމްޕްލޯއިމަންޓް ގާނޫނަށް ގެނައި އިސްލާހާ ގުޅޭ ގަވާއިދު މިއަދު ސަރުކާރުގެ ގެޒެޓުގައި ޝާއިއުކޮށް، އެ ބަދަލަށް އަމަލުކުރަން ފަށައިފިއެވެ. މި އިސްލާހަކީ މިއަހަރުގެ ޖެނުއަރީ މަހުގެ 8 ވަނަ ދުވަހު ރައީސުލްޖުމްހޫރިއްޔާ ތަސްދީގުކުރެއްވި ބަދަލެކެވެ.
މި އައު ގަވާއިދު ތަންފީޒު ކުރުމުގެ ޒިންމާ މަތިކޮށްފައިވަނީ މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވުޒާރާއަށެވެ. މި ގަވާއިދުގައި ބަޔާންކޮށްފައިވާ ގޮތުން، މި ގާނޫނު ހިނގާނީ ދައުލަތުގެ ވަޒީފާ އަދާކުރާ ނުވަތަ ކުރިން އަދާކޮށްފައިވާ ފަރާތްތަކުގެ މައްޗަށެވެ. ނަމަވެސް، ސިފައިން، ފުލުހުން، ފަނޑިޔާރުން އަދި ގާނޫނުއަސާސީގެ ދަށުން އައްޔަންކުރާ މަގާމުތަކުގައި ތިއްބަވާ ބޭފުޅުން މި އުސޫލުން އިސްތިސްނާވާނެއެވެ.
ރީ-އެމްޕްލޯއިމަންޓް އުސޫލުން ވަޒީފާ ދެވޭނީ އުމުރުން 65 އަހަރުން ފެށިގެން 75 އަހަރު ފުރުމާ ހަމައަށެވެ. މީގެ އިތުރުން، މި ގާނޫނަށް އަމަލުކުރަން ފެށުމުގެ ކުރިން ވޭތުވެދިޔަ 7 އަހަރު ދުވަހުގެ ތެރޭގައި، ޕެންޝަން ހައްގުވާ އުމުރު ހަމަވުމުގެ ސަބަބުން ވަޒީފާއިން ވަކިވެފައިވާ ފަރާތްތަކަށް ވެސް އަލުން ވަޒީފާ ހޯދުމުގެ ފުރުސަތު މި ގަވާއިދުގެ ދަށުން ވަނީ ހުޅުވާލާފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.